Inissiaq najugaqarfigisat piginneqataaffigiuk
Pisortat imaluunniit kommunit inissiaataannik attartuinnaratik Kalaallit Nunaanni innuttaasut pisariinnerusumik piginnittunngorsinnaanissaat anguniarlugu, inatsisip allannguuteqarnissaanut siunnersuummik naalakkersuisut ippassaq saqqummiussipput.
Namminersornerullutik Oqartussat inissiaataanik kommunerisalluunniit inissiaataanik piginnittunngorniaraanni malittarisassat assigiinnerulernissaat aamma anguniagaavoq, ineqarnermut naalakkersuisuusimasoq, Siumup inatsisartuni ilaasortaatitai sinnerlugit ineqarnermut politikkimut tunngasunik oqaaseqartartoq Jørgen Wæver Johansen oqarpoq:
- Taakkununnga atugassarititaasut assiigiittariaqarput, imaappoq attartortumiit piginnittumut ikaarsaariarnermi malittarisassat malitassaat assigiittuusariaqarput, taakkulu qaavatigut siunnersuutigineqarpoq attartortumiit piginnittumut ikaarsaariarnermi innuttaasut qanoq sivisutigisumik inissiami pineqartumi ineqarsimanertik tunngavigalugu akikillaavigineqarsinnaasariaqartut, Jørgen Wæver Johansen oqarpoq.
Illumik 1,5 millioni koruuninik nalilimmik 729.000 koruunilerlugu Jørgen Wæver Johansen pisisimasoq, AG-p marsip aallaqqaataani saqqummersup allaaseraa, Namminersornerullutillu Oqartussat illumik tunisinerminni naligitinneqartumut appasinnerusumik tunisiuassanersut aperigatsinni, Jørgen Wæver Johansen ima akivoq:
- Naalakkersuisut siunnersuusiaanni pingaarnerpaat tassaavoq ilaqutariit tuusintilippassuit ineqarniarnerup tungaatigut ullumikkornit periarfissarititaat pitsanngorsaavigineqarnissaat. Uanga illusininnut tunngatillugu malittarisassat tamarmik malittareqqissaarneqarnikuupput, immikkuullarissutullu isiginngilara, Siumup inatsisartuni ilaasortaatitai sinnerlugit ineqarnermut politikkimut tunngasunut oqaaseqartartua Jørgen Wæver Johansen oqarpoq.
Siunnersuut aappassaaneerneqannginnermi siorna ataatsimiititaliami eqqartorneqartussatut ingerlateqqinneqarpoq.
