Inissianut atatillugu suliaq: Attartortut peqatigiiffiliorsinnaapput
Birte Nielsen, Kommuneqarfik Sermersuup Iserit A/S aqqutigalugu inissiani attartortittagaani akerleriissutaaqisuni attartortoq, pisortat aqqutigalugit attartortutut pisinnaatitaaffimi ilarpaaluinik ujariatsigisaqarpoq.
Taassumami naluaa nammineq allallu inissiarsuarmi najugaqarfigisaani attartortut immikkoortortaqarfimminni attartutut sinniisoqarsinnaatitaanerlutik.
Aamma taamaaliorsinnaanngillat, taama Iserit A/S-ip pisortaa, Torben Kortegaard KNR-imut oqarpoq.
- Inissiani pineqartuni, pisiarisinnaatitaallugit attartorneqartuni, inissiat immikkoortortaqarfittut ilusilersorneqarsimannginneri pissutigalugit nalinginnaasumik najugaqartut sinniisaannik pilersitsisoqarsinnaanngilaq. Attartortulli najugaqatigiittut peqatigiiffiliornissaminnut pisinnaatitaapput, oqarpoq.
Birte Nielsen aamma ineqarneq pillugu malaartarfimmut malaarsinnaatitaanngilaq. Tamannalu inissiami namminersortumit sanatinneqarsimallunilu pigineqartumi attartortuuneranik pissuteqarpoq.
- Soorunami attartortitsisumut maalaarsinnaavugut. Aamma maalaaraangatta ilaanni akissutisisarpugut, oqarpoq, KNR-imut siusinnerusukkut oqaluttuarpoq.
Ineqarneq pillugu maalaartarfik
Ineqarneq pillugu maalaarfimmit kommunit imaluunniit Namminersorlutik Oqartussat inissiat attartortittagaannut tunngasut aalajangerneqarsimasut suliarisarpai, soorlu makku:
- Inigisamiit nuunnermi naatsorsuutit
- Inigisamut akiliutit qaffannerini ilisimatitsineq
- Inigisamik aserfallatsaaliuineq iluarsaassinerlu
- Inissiaatileqatigiiffiup aalajangiussaa periutsimut illersorneqarsinnaanngitsumut
Tusarfik: www.sullissivik.gl
Torben Kortegaardip oqarnera naapertorlugu Birte Nielsen inissianilu assingusuni attartortut allat ineqarneq pillugu maalaaruteqartarfimmut maalaarsinnaatitaanngillat, inissiat attartorfii pisortanit attartortittakkatut nalilerneqarsimanngimmata.
- Ineqarneq pillugu maalaaruteqartarfik inissianit kommunimit aamma Namminersorlutik Oqartussanit pigineqartuneersunik maalaarutinik suliaqarsinnaatitaavoq, oqarpoq.
Tassa taanna paasiuminaatsikkiga, inissiammi pisortat inissiaatileqatigiiffiutaat aqqutigalugu attartorsimavaat.
- Inatsisinut tunngavoq. Inissiammi Iserit A/S-imut tunniunneqarnikuupput, taamatullu aamma Iserit A/S namminersortutut tunngaveqartinneqarluni pilersinneqarnikuuvoq, taamaammat ineqarneq pillugu naammagittaalliuteqartarfimmit nalilerneqarnikuuvoq taakkua suliassaqarfiisa avataani inissisimasugut, Torben Kortegaard oqarpoq.
Inissiaq missingersuuteqanngilaq
Birte Nielsenip aamma inissiarsuarmut najugaqarfigisaminut missingersuutit pissarsiarisinnaasimanngilai, naak ineqarnermut akiliutigisartakkaminut ukiortaamit qaffaasoqarnissaanut ilimasaarneqareersimagaluarluni. Taakkuali takusinnaanissai aamma naatsorsuutigissanngilai.
- Attartortugut tamarmik allakkatigut ilimasaarneqarnikuupput. Inissianili kommunip pisiarisinnaatitaallugit attartorsimasaani attartortut inissianut immikkoortortaqarfikkaarlugit aaqqissuunneqarnikuunngillat. Taamaattumik taakkua missingersuuteqanngillat, Torben Kortegaard nassuiaavoq.
Inissianut atatillugu suliaq
Kommunip namminersortunit inissiarpaalunnik Nuummi attartorsimanera inatsisit malillugit ingerlanneqarsimanersoq suliami qitiuvoq.
Kommunit nakkutilliisoqarfiata kommunalbestyrelsit aqutsineq pillugu inatsit aamma pisortani ingerlatsinermi malittarisassat allat najoqqutaralugit ingerlatsinersut nakkutigisarpai.
Nakkutilliisoqarfiup kommunalbestyrelsip imaluunniit aningaasaqarnermut ataatsimiititaliap aalajangigaa atorunnaarsissinnaavaa, aalajangerneq inatsisinut atuuttunut naapertuutinngippat.
Kommuunit nakkutilliisoqarfiata suliamik misissuinermini aalajangigaq atuuttussaajunnaarallartissinnaavaa.
Kommunit Nakkutilliisoqarfiata Kommuneqarfik Sermersooq 2020-mi novembarimi inissianik namminersortunit attartukkaminik attartortitseqqiisarunnaarallarsikkallarpaa.
Tamatuma kingorna Namminersorlutik Oqartussat avataaneersumik suliamut misissuititsivoq. Misissuisut kikkuunersut KNR-imit paasineqanngillat.
Misissuisulli nalunaarusiartik Kommunit nakkutilliisoqarfiata allattoqarfianut tunniutereersimalerpaat.
Nakkutilliisoqarfiup siulittaasuata ilaasortat suliaq pillugu novembarip qulingiluaani ataatsimiinnissamut aggersarsimavai.
Tusarfik: Naalakkersuisut siulittaasoqarfiata inassuteqaataa, aqutsinermut inatsit, naalakkersuisut.gl, KNR.
Taava kommunip pisiarisinnaatitaallugit inissiani attartugaani najugaqartut sumorpiaq akiliuteqartarnerlutik paasisinnaatitaanngilaat?
- Tunngaviatigut oqaatigineqarsinnaavoq kommunip inissiarsuarmik piginnittumut akiliutigisartagaanit appasinnerungaatsiartumik akiliuteqartartut. Aamma attartortut tamarmik ilisimatinneqarnikuupput attartukkaminnut qanoq annertutigisumik akiliuteqartassanersut. Tamanna ilimasaarutini takuneqarsinnaavoq, oqarpoq.
Sooruna ineqarnermut akiliutit 2022-imit qaffanneqarnialereersut?
- Tamatumunnga pissutaasoq tassaavoq kommunip inissiarsuarmik piginnittumut akiliutigisartagaa qaffattussaanera. Tamannalu ineqarnermut akiliutit qaffaavigineqarnerannik malitseqarpoq. Aamma attartortunut qaffaanermut inissiarsuarmik piginnittup kommunimut akiliutigitittagaa sanilliunneqarpoq. Tamannalu ukiut tamaasa qaffalaartuartarpoq, Torben Kortegaard oqarpoq.
Suliarinnittussaatitaaneq atuuppoq
Inissiaq, Birte Nielsenip ukioq manna februaarip aallaqqaataani iserterfigisaa, nutaavoq. Kisianni inissiani nutaani nalaanneqarsinnaasartut allat assingalugit, amigaateqarluni kukkusumik suliaqarfigineqartarsimavoq, taakkualu Birte Nielsenip attartorfigisani aqqutigalugu iluarsitissimavai.
Tassunga atatillugu sanasoq Birte Nielsenimut igalaamik makittarissaajartorsimavoq. Sanasorli Birte Nielsenimut apeqqutinik qimataqarluni ingerlasimavoq.
Sanasummi Birte Nielsenimut oqaluttuarsimavoq inissiaqarfimmi allami, namminersortumit aamma sanatinneqarsimasumi, taamatullu Kommuneqarfik Sermersuumit innuttaasunut attartortinneqaqqissimasumi, sanaartortitsut amigaataasunut akisussaajunnaarsimasut, tamannalu isertertut amigaataasunik allattuisimannginnerannik pissuteqartoq.
Tamannali Torben Kortegaardip oqarnera naapertorlugu ilumuunngilaq.
- Pisuni inissiat suli ima nutaajutigitillugit sanatitsisup iluarsaassisussaatitaanera soorunami suli atuuttarpoq, taakkualu akiligassanngortinneqartunut akiliisussaatitaasarput. Taamaammat tamakkununnga aningaasartuutit attartortunut akiligassanngortinneqartanngillat, Torben Kortegaard oqarpoq.
