Inissianik ussissaaneq kiassaasersuilluarnerlu sipaarutaasinnaapput

Nunatsinni inissiat ussissarluarlugit init ilui silaannarissaruminarsaraanni, nukissiamik atuineq 40 procentimik annikilleriarneqarsinnaavoq. Nuummi misilittaanerit tamanna takutippaat. Sisimiuni ataatsimeersuarnermi nunanit tamanit peqataaffigineqartumi, init silaannarinnerat pingaarnerit ilaattut oqaluuserineqarpoq.

Sisimiuni Rambøllimi atorfilik, Jørgen Hansen ataatsimeersuarnermi peqataasoq, init silaanarissaruminartut nukissiamik atuinikinnerusarnerat misilittagaqarfigaa. Taamani init ussissaqqinneqarput, igalaat sinaat ussissarneqarlutik, kiassaatillu uuttuutaat aqutsissutaasut tulluarsarneqarlutik. Tamakkua kingunerannik ineqartut kiassarnermut 40 procentimik sipaarsinnaalertarput. Ukiunili makkunani init silaannarissaruminarsarlugit iluarsaanneqartarnerat pingaartinneqarunnaarmat inissiat ussiissigaluttuinnarput kiassarnermullu nukissiamik atuipiluffiulerlutik, Jørgen Hansen oqarpoq. 1980-ikkunni inissiat aamma paarilluarneqarpianngillat. Maannakkut aamma pigisat paarilluarnissaat qanoq pingaartigisoq tamanut paasissutissiissutigineqartariaqaraluarpoq. Inissianimmi kusanartorsuarnik sanaartorneq ajunngilaq, paarilluarlugit aserfallatsaalinissaat eqqaamasinnaagaanni.

Sisimiuni ataatsimeersuarnissamik aaqqissuisut siulittaasuat, Bendt Michael Nielsen oqarpoq, kusanartunik illuliortoqartuaraluartoq paarilluarlugit aserfallatsaalinissaasa qanoq pingaartiginerat puigorneqartarmat, maanna inissiat peqqinnarunnaarlutik aserfallakkiartuinnartut.

-Neriuppunga ataatsimeersuarnermi paasisatta siaruaannerisigut Kalaallit Nunaanni, Danmarkimi nunanilmi allani iluaqutigineqarnissaat neriuutigalugu, Bendt Michael Nielsen oqarpoq. Nunarsuatsinnit tamanit illunik titartaasartut, ingeniørit, illuliortitsisartut illuliornernillu suliallit ataatsimeersuarnermi peqataapput. Ataasinngormat aallartikkamik aqagu naggataassapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat