Inissianik piginneqatigiinnut nutaanik malittarisassaqalissaaq
Inissianik piginneqatigiinnut nutaanik malittarisassaqalissaaq. Pineqartut pillugit manna tikillugu inatsiseqanngikkaluarpoq, Naalakkersuisulli nutaamik maanna inatsisiliorniarput, Nunatsinni piginneqatigillutik inissiaatilinnut piumasaqaatitalimmik.
Naalakkersuisunut ilaasortaq, Kim Kielsen, saqqummiussisoralugu Naalakkersuisut ullumikkut peqqussutissatut siunnersuuteqarput, tassani pineqarlutik piginneqatigiillutik inissiaatileqatigiinnut malittarisassatut aalajangersakkat. Ilaatigut pineqarlutik ataatsimut aningaasartuutit, sillimmasiinerit, aqutsineq aamma naatsorsuutit. Piginneqatigiillutik peqatigiiffiit malittarisassaat manna tikillugu naleqqussarneqaannartaraluarput.
Tamannali maanna allanngortinniarneqarpoq.
- Peqqussutissatut siunnersuut nutaajuvoq. Pisortanit inatsisitigut siusinnerusukkut naleqqussaasoqarsimanngilaq, tassa inissianik piginnittuusarneq ukiuni kingullerni aatsaat atorneqalermat. Inissianik piginnittut amerliartuinnarput, taamaattumik inatsisitigut naleqqussaanissaq pisariaqartinneqarpoq, Ineqarnermut Attaveqarnermullu naalakkersuisoq, Kim Kielsen, oqarpoq.
Siunnersuut Inatsisartuni naalakkersuisoqatigiinnit illuatungiliuttunillu tapersersorneqarluarpoq. Godmand Rasmussenip Atassummeersup ilaatigut maluginiarpaa “inissianik piginnittut siunissami pisinnaatitaaffitik pisussaaffitillu nalornisigiunnaassagaat”.
