Inissianik iluanaarniuteqartartut inatsisartunit pakkersimaarniarneqalerput
Inissianik iluanaarniuteqartut inissiaatitik 20-20-60 atorlugu taarsigassarsinikkut aningaasalersorsimappatigik iluanaarniuteqartut aningaasatigut pillaatissinneqartarnissaat pillugu siunnersuut Inatsisartunut ilaasortanit 22-nit isumaqataaffigineqarpoq akerliusoqaranilu.
Inatsissatut siunnersuut IA-mi ilaasortamit Olga P. Berthelsenimit saqqummiunneqartoq ukiakkut ataatsimiinnermi siullermeerlugu oqaluuserineqarpoq maannalu ataatsimiititaliani oqaluuserineqaqqaarani pingajussaaniigassanngorlugu ingerlatinneqarluni.
Attartortitsisut suliffeqarfinnut pisortaniluunniit oqartussaasusnut attartortitsinerminni qanoq akiliuteqartitsisarnissaat nutaamik inatsisikkut killiliiffigineqassaaq. Attartortitsinermut akigitinneqartumi attartortitsisup aningaasartuutivii erniallu amerlagisassanngitsut siunissami taamaallaat akilerneqartalissapput.
Attartortitsisut manna tikillugu qanorsuaq iliuuseqarsinnaapput, Nuummilu inissianik niuernermi sulisunut inissiat attartortinneqartarnerata annertunera ilisarnaataalluni. Tamatumani inissiat sisamanik-tallimanik initallit qaammammut 20.000 kr.-it angullugit akeqarsinnaapput.
Inatsisissatulli siunnersuummi akiliutissat amerlanerpaaffissaata inissisimaffissaa aalajangerneqanngilaq. Tamanna tusarniaavigineqartut arlallit ajornartorsiutaasutut uparuarpaat, taamaakkaluartorli Inatsisartunut ilaasortat tamarmik siunnersuut isumaqatigalugu.
Inatsit inissianut 20-20-60 atorlugu taarsigassarsinikkut aningaasalersorneqanngitsunut aammattaarlu inissianut taarsigassarsiat tamakkerlutik akilerneqarfigisimasaannut atuutinngilaq.
