Inissianik 200-nik sanaartorniartut
Nuup Kommunalbestyrelsiata missingersuusiamini Nuummi nunaqarfiinilu 200-nik attartortittakkanik inissialiornissaq siunniuppaa. Nuup nunaqarfiisa aappaat Qeqertarsuatsiaat sisamanik illuliortitsinissamik siorna qinnuteqareersoq neriuutissaqarnerpa?
Teknikkimut ataatsimiititaliami siulittaasoq Nikolaj Heinrich ima oqarpoq:
-200-nngortinneqarneratigut isumaqatigiinniarfigineqaqqissapput qanoq pisariaqartitsineq atsiginersoq tassani naliliiffigineqaqqissalluni. Taakkua qularutissaanngilaq sisamanik ilaneqarsinnaassapput, Nikolaj Heinrich oqarpoq.
Qeqertarsuatsiaani 1900-kkunnili kingullermik sanaartortoqarpoq. Maanna initaarniarlutik utaqqisut allatsissimasut 21-nngorsimapput.
- Tassa nunaqarfimmi aqutsisut namminneq aalajangigassaraat. Kikkunukua sallerpaatillugit naalanneqassanersut, taakku qulaaningaanniit naalakkerneqarnissaat pissusissamisuunngilaq.
Nikolaj Heinrich aamma oqarpoq Kapisilimmi nunaqarfinni aqutsisut Qeqertarsuatsiaanisulli illunik sanaartornissanik kissaateqarnersut aperineqarumaartut.
