Inissialiorneq aningaasaliiffigineqangaatsiartariaqarpoq
![](/sites/default/files/styles/image_934x467/public/article_images/mth_pressefoto_2_0.jpg?itok=phqXYrjm)
- Nuannaarnissannut tunngavissaqarluarpunga, tassami partiit oqariartuutaat ataatsimut isigalugit pitsaaqimmata. Kikkut tamarmik isumaqarput nutarterisariaqartugut, isaterissasugut nutaanillu sanaartussasugut, Jens B. Frederiksen oqarpoq.
Inissianik ukiuni tulliuttuni sanaartortoqarnissaa pillugu aningaasaliisoqangaatsiassasoq nassuiaammi atuarneqarsinnaavoq, inuillu inissianik attartornatik namminneerlutilli inissiamik piginnittuulersinnaanissaat, Jens B. Frederiksenip naalakkersuisut sinnerlugit kissaatigaa.
Inissianut aningaasalersueriaatsit taamaammat misissorneqarnissaat siunniunneqarpoq, soorlu aamma attartornermut akit qaffanneqarniartut, aserfallatsaaliinissamut akissaqarnissaq matumani anguniagaalluni.
Akissaatikinnerusut ineqarnermut akiliummut qaffasinnerusumut tapiiffigineqartariaqartut, Naalakkersuisut isumaqarput, assersuutigalugu ineqarnermut, akileraartarnermut isumaginninermullu politikkip ataqatigiissinneqarnissaat sulissutiginiarneqarluni.
Ineqarnermut pissutsit siunissaq eqqarsaatigalugu aaqqiivigineqarnissaat, partiit tamarmik isumaqarput, inissiat aserfallassimaqimmata, ilaallu ussiitsunngorsimallutillu oqoqalersimamata.
Ineqarnermulli naalakkersuisoq aamma isornartorsiorneqarpoq. Tamanna pillugu annerusumik ullup qeqqanut radioaviisimi tusagaqarsinnaavutit.