Inimik attartortut nuuttarnerat INI-p akiligassaanut qaffassaataanngilaq

Inigisaminniit nuuttartut pissutigalugit Inissiaatileqatigiiffiup INI-p akiligassai amerliartunngillat, Tuapannguanili inissianik attartortussat qaammatit arfinillit tikillugit qularnaveeqqusiillutik akileeqqaarnissaat piumasarineqarpoq.
decembarip 03-at 2009 05:43

Akiligassat 2007-imi 72,1 millionit koruuniniit 58 millionit koruuninut ukioq manna juunip naanerani apparsimapput.

Tuapannguani napasulini inissianik attartortussat 30-t qaammatit arfinillit tikillugit qularnaveeqqusiillutik akileeqqaarnissaannut ilaatigut pissutaatinneqaraluarpoq, INI ima akiligassaqartigisoq qaammatini pingasuni qularnaveeqqusiinissaq naammannani. Paragraf 36 naapertorlugu Atassummit apeqqutigineqartoq Ineqarnermut naalakkersuisup, Jens B. Frederiksenip, nammineq taama akereerpaa.

Siumumi siulittaasup Aleqa Hammondip Jens B. Frederiksen paragraf 36 naapertorlugu nutaamik maanna nassuiaateqaqquvaa.

Tuapannguani napasulianut nuuttussat qaammatit arfinillit qularnaveeqqusiillutik akileeqqaarnissaannut aamma peqqutaanerarneqarpoq, attartortussat 30-naammata. Tassa qaammatini arfinilinni qularnaveeqqusiisoqanngippat attartortussat sinnerisa 29-t inigisaminnut akiliutaat 4 procentimik qaffassaaq, tassa attartortoq ataaseq qaammat ataaseq akiliinngitsooraluarpat, Ineqarnermut naalakkersuisup, Jens B. Frederiksenip, Atassummut paragraf 36 naapertorlugu akissutaani allassimavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq