A/S INI: Uivernissamut pissutissaqanngilaq

Uivernissamut pissutissaqanngilaq.

Angerlarsimaffinni asbesteqaraluarpalluunniit qanillinaviarunanngilaatit.

Ineqarnermut Attaveqarnermullu Pisortaqarfimmiit taama nalunaartoqarpoq.

Ulloqeqqani Radioaviisimi oqaluttuaraarput INI-p inissiaataani asbesti qanoq atugaatiginersoq ilisimaneqanngitsoq.

INI-mit oqaluttuarineqarpoq inissiani asbesteqarnissaa ilimanartoq aamma uppernarsarneqarpoq aatsaat 1987-imi asbestip sanaartornermi atorneqarnissaa inerteqqutaalersimasoq. Taamaattorli 70-ikkut naalernerannili sanaartornermi asbesti atorneqarunnaarsimavoq.

Taamaattorli nunarput tamakkerlugu 70-ikkut naalernerat sioqqullugu sananeqarsimasunik inissiaqarpoq aamma taamanikkut sanaartornermi asbesti atorneqartarsimasinnaasoq Ineqarnermut Attaveqarnermullu Pisortaqarfimmi pisortaagallartup Olafur Nielsenip oqaatigaa:

- Namminersornerullutik Oqartussat inissiat 1987-imi naalagaaffimmiit tigusaat qularnanngitsumik ilaatigut arlaatigut asbesti atorlugu sanaajusimassapput.

- Asbestitaqassagunik asbestitaa inip iluaniinnavianngillat, qalianiissinnaapput imaluunniit inissiap silammut sammineraniissinnaallutik. Taamaattumik uivernissamut pissutissaqanngilaq, Olafur Nielsen oqarpoq.

Inissiap ilaa asbestitaqaraluarpalluunniit najugallit tamakkua qanillingaarnavianngikkaat aamma oqaatigaa.

- Asbesti ersiinnartumiinnavianngilaq. Inissiap qaliata ilaanniisinnaavoq imaluunniit qalipanneqarsimasinnaalluni tamannalu annilaanngatissaanngilaq. Asbesti iikkamiitilluni uloriananngilaq, aatsaanuna puannut pigaangami ulorianarsisartoq. Iikkamiittoq iigaq putoqanngippat asbesti katagarnavianngilaq taamalu annilaanngatigisassaanani, Olafur Nielsen oqarpoq.

Inissiami najugarisanni asbesteqarnersoq nalornilerukku INI imaluunniit kommunerisat paasiniaavigisinnaavat.