INI: Attartortut qiiasariaqassapput
Tassalu ineqarnermut akiliutit qaffanneqanngippata imaluunniit Namminersorlutik Oqartussat aningaasaliinngippata, pitsanngorsaanissaq suli ungasittoq, INI A/S-imiit oqaatigineqarpoq.
- Ilumoorpoq, Aasianni ineqarfiit ilaanni kiasssarnikkut taavalu erngup kissartup kissarpallaannginneranik eqqugaaqqasartut sivisuumik, INI A/S-imi tusagassiisartoq Bikki Reimer oqarpoq.
Tassalu aamma taamaalilluni ilumoornerapaa, inissianik attartortut ilapassui qiulertartut.
Kisianni tassa piginnittut aaqqiinisasasa tungaanut nillermiugallassapput:
- Tassa allatut ajornaqaaq, tamanna allaqqunenqarsinaanngilaq, Bikki Reimer oqarpoq.
Aasianni Nalunnguarfimmi Aqqullummilu inissiat amerlanersaat Wille Brandtsvejimilu inissiat ilaat kiassartumik imeqaratik kiassaataallu kissaratik qaammatit marlungoreerpaat, aatsaallu taamaagatik.
Miki Jensen oqaluttuarpoq inigisaminnut septembarimi 2009-mi nukkamilli ataasiaratik uunartumik imeerutarlutik kiassaatillu kiakkunnaartarlutik, marlungormallumi aamma taamaattoq.
Aamma attartortorpassuit INI A/S-ip Aasianni allaffianut saaffiginnikkaluaraangamik ikiorneqarsinnaanatik misigisimasartut, Miki Jensen oqaluttuarpoq.
Taamaammat atukkatik amerlanerullutik naammagittaalliuutiginiassagamikkit nulianilu aammalu ilaqutariit allat atsiornernik katersipput.
Bikki Reimerilli erseqqisarpaa, attartortut INI A/S-ip allaffianut saaffiginnikkaagamik iluamik pineqartartut.
Aamma inissiat attartornerinut akiliutit inissiat pitsaassusaannut - imaluunniit pitsaanngissusiannut - naleqqussarneqartariaqartut, Miki Jensen isumaqarpoq. Bikki Reimer tamatumunnga ima oqarpoq:
- Inissiap attartortinera qanoq ittuussanersoq, inissianik piginnittut aalajangertarpaat. Inissiat assigiinngitsut attartortinneqarneranut qanoq akiliisoqartassanersoq inissianik piginnittup aalajangertarpaa, tassalu namminersorlutik Oqartussat imaluunniit kommunit, INI A/S-imi tusagassiinermik suliaqartoq, Bikki Reimer oqarpoq.
Taannalu aamma oqaluttuarpoq, INI A/S-ip suliassaani tullinguuttoq, piginnittut -tassalu Namminersorlutik Oqartussat - aperisallugit inissianut taakkuninnga, INI A/S-ip oqarneratut ussiittuusinnaassunik - iluarsaassinissamut immikkut aningaasaleerusunnersut.
