Ingerlatseqatigiiffinnik tigusinissaq oqaluuseraat

Nunaqarfinni Kalaalimerngit, tassalu NUKA A/S kiisalu nunaqarfinnik pilersuisoq Royal Arctic Bygdeservice A/S KNI A/S-imit tiguneqarsinnaanerat, Inatsisartunit sisamanngorpat siullermeerlugu oqaluuserineqartussaq, KNI-p pisortaanerata Gerhardt Petersenip aamma Naalakkersuisut siulittaasuata Hans Enoksenip kiisalu Namminersornerullutik Oqartussani atorfilittat Nuummi arfininngormat ataatsimiissutigaat.

- NUKA-mut tunngasut piareeqqasorujussuupput, NUKA-mi sulisut uagullu piareeqqavugut. Naalakkersuisut siulittaasuannut iliuusissavut tunisassiornermilu suliniutiginiakkavut saqqummiuppavut. Gerhardt Petersen nassuiaavoq.

Ingerlatseqatigiiffiit KNI-mit tiguneqarnissaat suli aalajangiivigineqanngikkaluartoq qanoq ililluni pilersaarusiortoqarsinnaava ?

- Piginnittut upernaarli peqquaativut, ingerlatseqatigiiffinnik tigusinissatsinnut misissueqqulluta, taamaaliorpugullu. Pilersaarutitsinnik saqqummiussivugut, Naalakkersuisullu siulittaasuat Inatsisartunit apeqqutigineqarsinnaasunik tupinnanngitsumik aamma ilisimatinneqarpoq. KNI-p pisortaanera erseqqissaavoq.

KNI NUKA-mik tigusissappat qanoq siunnersuisinnaatigissava, nunatta pissarititaasa tunisassiorineqarnerat eqqarsaatigissagaanni ?

- NUKA-mi sulisut sineriatsinniittut suliartik tunisassiorneq pikkoriffigereerpaat, uagullu niuernermut tunngasut pikkoriffiginerullutigik. Atuisut piumasaat nalunngilluarpavut, taamaalilluta tunisassiat atuisullu piumasaat suleqatigiissutigisinnaallutigik. Tunisassiortut tunisassiussapput, allaffissortullu allaffissussapput. Teknikkikkut qerititsiveqarnikkullu aamma suleqatigiissinnaavugut. Gerhardt Petersen tunngavilersuivoq.

Aamma tunisassiat nuuliaateriarlugit poortorneqartartut assersuutigalugit oqarpoq, nuuliaasseqqaarnani tunisassiorfiit namminneerlutik tunisassiortalernissaat toqqaannartumillu pisiniarfinnut tunineqartalernissaat siunniunneqartoq.

Naalakkersuisut Inatsisartunut siunnersuutaat naapertorlugu NUKA ukiortaamit kiisalu Royal Arctic Bygdeservice 2006-imit KNI-mit tiguneqassapput.

Arctic Umiaq Line-p aamma tiguneqarsinnaanera siunniunneqarsimagaluarpoq, tamannali Naalakkersuisunit maanna inassutiginartinneqarnani. Nunaqarfinnulli ilaasartaateqarnerup tamakkiisumik tigunissaa suli sulissutigalugu Gerhardt Petersenip erseqqissaatigaa.