Avaleraasartoorniarneq Ingerlatseqatigiiffiit pingasut avaleraasartoortassinneqartut

Avaleraasartoorniarneq ingerlalluarpoq, tunisallu amerlisimallutik. Aalisariutit 13-it Tunumi maannamut avaleraasartuut pisarisaat 35.755-it tonsiupput, pisiarineqartut siornamut naleqqiullugit 101 tonsinik amerlanerullutik.
Assi © : Magnus Simonsen
Allattoq Karsten Sommer, Bikki P. Kleist
aggustip 22-at 2017 08:37

Amerlanerusunik avaleraasartoorniarnissaq anguniarlugu avaleraasartoortassiisoqaqqqittussanngortoq, Aalisarnermut Piniarnermullu Naalakkersuisoq, Karl-Kristian Kruse, tallimanngormat aggustip 18-iani aalajangerpoq. 

Avaleraasartuut ingerlatseqatigiiffinnit aalisarneqanngitsut 8.500 tonsit ingerlatseqatigiiffinnut allanut agguagassanngorlugit pisassiissutaapput.

Naalakkersuisut nalunaarutigaat.

Ingerlatseqatigiiffiit agguaaffigineqartut tassaapput: Arctic Prime Fisheries, 3.000 tonsit, Arsuk Food, 500 tonsit aamma Sermilik 500 tonsit.

Aalisarnermut Piniarnermullu Naalakkersuisoqarfiup avaleraasartuut 4.500 tonsit kingusinnerusukkut pisassanik pisariaqartitsisunut tunniunneqarsinnaaneri siunertaralugu immikkoortippai.

Misilittakkat ukiut siuliini takutippaat sapaatip akunnerini marlunni-pingasuni suli avaleraasartoorniarluartoqarsinnaassasoq.

Misileraalluni avaleraasartuut ukioq manna pisassiissutigineqartut 66.365 tonsiupput.

Avaleraasartuut 2015-imi 30.379 tonsit pisarineqarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq