Ingerlatseqatigiiffiit kalaalinngorsarlugit
Kalaalinngorsaanerup aammattaaq ingerlatseqatigiiffinni Namminersornerullutik Oqartussat pigisaanni atuuttussanngorlugu ingerlateqqinnissaanik, Siumup siulittaasuata Hans Enoksenip nalunaaruteqarnera, kalaallit sulisitsisut peqatigiiffiannit NUSUKA-mit nersualaarneqarpoq.
Siumup ataatsimeersuarnerani Hans Enoksen siulittaasutut nalunaarummini allappoq Namminersornerullutik Oqartussat ingerlatseqatigiiffii pisortanik kalaallisut oqaasilinnik atorfinitsitsinissaminnut pinngitsaalineqarsinnaasariaqartut.
NUSUKA-p siulittaasuata Gerth Lyngep ataatsimeersuarneq najuuffigaa, taannalu Hans Enoksenip taamatut ilimasaaruteqarneranut naammagisimaarinnilluinnarpoq.
- Tamanna nalunaarutaavoq pissusissamisoorluinnartoq. Piginnittut ingerlatseqatigiiffiillu qullersaasa akornanni attaveqaqatigiinneq najukkami oqaatsit atorlugit pisinnaanissaa pingaaruteqarpoq. Tassa taamatut ingerlasussaavugut. Taamatullu ingerlasoqarpoq, Gerth Lynge oqarpoq.
Kalaallit Nunaanni Sulisitsisut Peqatigiiffiannit oqaaseqartitsiniaraluaratta iluatsitsinngilagut.