Ingeniøren: Kalaallit Nunaata aatsitassarsiorneq kisimiilluni aqussinnaanngilaa

Kalaallit Nunaata aatsitassarsiornermi pilersaarutit kisimiilluni siunissami aqussinnaanngilai. Pisuussutimmi iluaqutigineqarsinnaasussat annertullutillu aarlerinartoqarsinnaapput. Atuagassiap Ingeniørenip aaqqissuisua Henning Mølsted pingaarnertut ullumi taama allaaserisaqarpoq:
 
- Aatsitassanut Ikummatissanullu Aqutsisoqarfiup, 20-t inorlugit sulisullip, aatsitassanut avatangiisinullu tunngasunik amerlasinnaasunik aqutsisinnaanissaa ajornakusoorsinnaassaaq. Aatsitassarsiortitseqatigiinnimmi isumaqatigiissusiornermi saniatigut, uranimut tunngasunik Danmarkimik suleqateqarani qanoq ililluni aqutsisinnaassava nakkutiginnillunilu, avatangiisillu mianerineqarnissaat pillugu aamma suliniuteqarluni? Henning Mølsted aperivoq, aatsitassarsiortitseqatigiillu ilaasa aningaasat kaaviiaartitaat, Nunatta ataatsimut kaaviiaartitaannit ilaatigut amerlanerunerat eqqaasitsissutigalugu.
 
Issittumi uuliasiorlunilu aatsitassarsiornerup aarlerinartoqarsinnaanera, immikkut ilisimasallit isumaqatigiissutigaat. Kuannersuarni pilersaarutit peqqissutsimut avatangiisinullu ulorianaateqarsinnaanerat assersuutigineqarpoq.
Issittumi uuliasiornermi ajutoortoqassagaluarpat, upalungaarsimanerup killeqarnera immikkut aamma taaneqartarpoq, Issittumi uuliamik maqisoortoqassagaluarpat assersuutigalugu taartumi sikumilu saliinissamut periusissanik suli ineriartortitsisoqarsimanngimmat.
Aalisakkat qaleruallillu suffisarfiisa uuliasiortitseqatigiinnit mingutsinneqarsinnaanissaat aamma aarleqqutigineqarpoq.
 
Naallu Kalaallit Nunaat kikkut suleqatigineqarnissaannut nammineq aalajangiisinnaassuseqaraluartoq, Henning Mølstedip aamma eqqaasitsissutigaa aatsitassarsiortitseqatigiit uuliasiortitseqatigiiffiillu avatangiisinut piujuaannartitsinissamullu tunngasunut nunanut Europap avannarpasinnerusortaaniittunut naleqqiullugu namminneq periaaseqarsinnaasartut:
 
- Imminut illersorniartutut, akuliunniartutullu pasillerneqartutut imminut isiginini Danmarkip unitsittariaqarpaa. Issittup Nunat Europap avannarpasinnerusortaaniittut eqqarsartariaasiat malillugu ineriartortinneqarnissaa qulakkeertariaqarparput, avatangiisinik mianerinninneq, piujuaannartitsinissarlu matumani pingaartinneqartariaqarlutik, Henning Mølsted oqarpoq.
 
Danmarkimi nukissiuuteqarnermi suliffeqarfiit annersaasa ilaattut Dongitut ittumik, Namminersorlutik Oqartussat pilersitsinissaat, taannalu aqqutigalugu aatsitassarsiortitseqatigiinnik suleqateqarsinnaanissamut isumaqatigiissusiortoqarsinnaanissaa, Ingeniørenip aaqqissuisuata takorloorpaa.
 
Uranimut tunngatillugu DTU Risø ilaatinneqartariaqartoq aamma isumaqarpoq, DTU Risøp uranilerinermi nakkutilliisuunissaa siunnersuutigalugu.