Juulimaaq ukioq manna parsiarneqarsinnaassanngilaq
Juulimaap Air Greenlandip qulimiguuliutaanut ilaalluni decembarip ulluisa 24-anni ullaap tungaani ukiut tamaasa takkuttarnera tamanut nutaarsiassatsialaavoq.
Inuilli amerlasuut ataatsimoornissaat ukioq manna pinngitsoortinniarsarineqarpoq, Nuummilu ukioq manna miffissat sisamaassallutik.
Innuttaasut najukkaminnut qaninnermi peqataanissaat kajumissaarutigineqarpoq.
Juulimaap miffissaa siulleq tassaavoq Qinngorput narsarsuarmi Atuarfik Hans Lyngep ukkusissallu akornanni, nalunaaqutaq qulinut qiteqquppat.
Miffissap tullia tassaavoq ujakkaartartut ikaartarfiata qaqortup Ilisimatusarfiup eqqaaniittup saava, nalunaaqutaq qulinut tassani missalluni.
Kingorna taava Tuapannguit nuunnguanni aqqanermut qiteqquppat missaaq, miffissarlu kingulleq tassaalluni Dronning Ingridip Napparsimmavissuata saava nalunaaqutaq aqqanermut.
Juulimaaq aalateriumaarpoq
Miffissani sisamani tamani assersuisoqassaaq. Qulimiguullip minnerani isumannaallisaanikkut palleqqusaanngitsumik katersuuteqqusaannginnermullu killiliussat eqquutsinneqarnissaannik qulakkeerinissaq assersuinermi siunertaavoq. Taamaammat assersukkat miffimmilu maleruagassat ataqqeqquneqarput.
Peqqinnissaqarfiup qullersaqarfia tusagassiutinut taama allappoq.
Juulimaaq arpalluni ukioq manna tassa parsiarneqarsinnaassanngilaq.
Tamatumunnga taarsiullugu juulimaaq angalaarluni takkuttunut aalaterissaaq ilassiorlunilu tamatumalu saniatigut juulimaap ikiortai angalaassapput meeqqat takkussimasut – allallu meeqqatut nuannaartut ukioq manna pisarnertut juulimaamit ilassinnissutinnguamik pissarsinissaat qulakkeerlugu.
- Juulimaap qulimiguulimmut ilaalluni takkuttarnerata ukioq manna taamaatinneqannginnissaa nuannaarutigeqaarput. Tamanna ukiut tamaasa qilaanaarisarparput amerlaqisunullu qanoq pingaartinneqartigisoq nalunngilarput, peqqissaasut qullersaat Ella Skifte oqarpoq.
Nuummi sila atoruminaassappat sillimasoqarpoq. Ukiualuit matuma siorna pisoqarnerasut, juulimaap qulimiguulimmik takkunnissaanut sila akornusiissappat angallassisussatut angalanissallu qulakkeernissaanut Nuummi Qatserisartut piareersimapput.