Inernera: Nunap ikuallannera Qeqqata Kommunianut taama akeqartoq
Pujoorivik aasallu kiannerani nunap panernera Qeqqata Kommunianut assigiinngitsutigut unammillernartoqarpoq.
Kangerluarsuk Tullermi nunap ikuallannerani aningaasartuutit
- Sisimiuni qatserisartunut akissaatit - 657.000 kr.
- Maniitsumi qatserisartunut akissaatit - 96.000 kr.
- Ikiuuttunut allanut nunatta avataaneersunut - 1.200.000 kr.
Kangerluarsuk Tullermi Sisimiut avannaata kangiani inissisimasumi pujooriviup nakkutigisap nuna ikuallatsilermagu nunap ikuallarujussuarneranik aasaq manna kinguneqarpoq.
Nunalli ikuallannera Sisimiuni Maniitsumilu qatserisartunit siullermik qamisarniarneqarsimasoq aamaartuarsinnarsimallunilu ikualaqattaarsimavoq.
Qatserutit mikivallaarlutillu naqitsinikippallaartut
Qatserisartummi nunap ikuallannerujussuanut qamisaaniarnerminni atorsimasaat mikivallaarlutillu naqitsinikippallaarsimapput. Taamaattumik Qeqqata Kommunia Kommune Qeqertalimmut Avannaatalu Kommunianut ikiortissarsiorpoq. Tamannali naammassimanngilaq.
Qeqqata Kommunianimi qatserisartut siornatigut nalaannikuunngisaannarsimasaannik nunap ikuallannera pilertortumik ikualarujussuariasaaqattaartarsimavoq, tamannalu Naalakkersuisut Danmarkip Upalungaarsimanermut Aqutsisoqarfianut ikiortissarsiorneranik kinguneqarpoq.
Qeqqata Kommunianullu tamanna akeqarpoq.
Qeqqata Kommuniami 657.000 koruuninik Sisimiuni qatserisartut akissarsiaannut 96.000 koruuninillu Maniitsumi qatserisartunut aningaasaliissuteqaqqittariaqarsimavoq. Aamma 1,2 millionit koruuninik nunap ikuallanneranut atatillugu ikiuuttunut allanut nunatta avataaneersunut akiliisariaqarsimavoq.
Tamanna kommunalbestyrelsip ataatsimiinneranit imaqarniliami allassimavoq.
Nunamut saligaasiorneq
Qeqqata Kommuniami naapertorlugu nunap ikuallannera atortutigut unammillernartoqarfiusimavoq, ingammik nunamut saaligaatit amigaataasimammata aammali qatserinermut atortut slangit imaarsaatillu naqitsinikippallaarsimammata. Taamaattumik nunap ikuallattup qamisarniarnerani nunamut saligaasiortoqarsimavoq aamma slanginik imaarsaatinillu illoqarfiit allat qatserisartoqarfiinit Sisimiunilu suliffeqarfinnit namminersortunit pissarsisoqarsimavoq. Qeqqata Kommuniami nunap ikuallaleruttornerani sisamaannarnik nunamut saligaataateqarsimavoq.
Kommunit nunami pinartoqarneranut upalungaarsimasuutitaqarnermut 2010-mi juulip aallaqqaataani akisussaatinneqalerput. Tamatumunnga atatillugu suliassat 2010-kkut qiteqqunerisa tungaannut annertusarsimanngitsut Qeqqata Kommuniata ilisimatitsissutigaa, ingammilli Qaasuitsup Kommunia piugallarmat Qeqqatalu Kommunia 2017-imi nunap ikuallanneranik arlaleriarlutik ajornartorsiuteqarput.
Taamaattumik Qeqqata Kommuniata Namminersorlutik Oqartussat kommunillu allat nunamik ikuallattoornermi suleqatigiinnerup tungaatigut pitsanngorsaanissaannut kommunillu nunami pinartoqarneranut upalungaarsimasuutitaqarnermut akisussaatitaanerannut atatillugu aningaasaliissutigineqartartut amerlassusaannik nalilersueqqinnissaannut noqqaavigisussanngorpai.
