Inequ 7-inik ukiulik corona pillugu killilersuinerit pillugit: Ajunngikkaluarluni kusanaalaarpoq
Nuummmi Upernavimmilu meeraaguit ulluni makkunani timersortarfimmi assammik arsarsinnaanallu angajoqqaatit sutorniartarfimmut neriartoqatigisinnaanngilatit.
Malittarisassammi nutaat naapertorlugit meeqqat marlunniit 12-it tikillugit ukiullit, qanittukkut coronamik tunillatsinnikuunngitsut, inuit tamarmik ornigarsinnaasaannut tamangajannut iseqqusaanngillat.
12-illu qaangerlugit ukioqaruit akiuussutissinneqarnikuuguit aatsaat iseqqusaallutit.
Taamaammat Inequ Olivia Koefoed Lynge arfineq marlunik ukiulik Nuummi najugalik pisarnermigut pissittaarluni eqaarsaariarsinnaanngilaq.
Nuummi Upernavimmilu corona pillugu killilersuutit
Meeqqat marlunniit 12-it tikillugit ukiullit ulluunerani paaqqinnittarfinniissinnaapput, atuarfinniissinnaallutik kiisalu fritidshjemminiissinnaallutik.
Meeqqat taakkua aamma bussinut ilaasinnaapput, niuertarfiliarsinnaallutik kiisalu allakkerisarfimmut ilaasinnaallutik.
Decembarilli 5-iata tungaanut meeqqat taakkua coronavirusimik tunillatsinnikuullutik qaangiisimanngikkunik kiisalu ullut minnerpaamik 14-it sivisunerpaamillu sapaatip akunneri 12-it matuma siorna PCR-test atorlugu misissortissimanngikkunik, makkunaneeqqusaanngillat.
- Sutorniartarfiit, cafét, imerniartarfiik, discotekit kiisalu silami taakkununnga atasut.
- Ingerlatsiviit kulturilerinermut atasut soorlu bibliotekit, illlut kulturileriffiit, filmertarfiit, katersungaasiviit kisialu inersuit saqqummersitsiviit.
- Innuttaasut illui kiisalu katersortarfiit.
- Illut iluini silamilu timersortarfiit soorlu init timersortarfiit inersuit timersortarfiit, naluttarfiit, timigissarfiit fitnessertarfiit kiisalu arsaattarfiit.
- Nujaleriviit, tangiaasarfiit, pinnersartarfiit assigisaallu.
- Niuertarfiit ulluinnarni pisarialinnik nioqquteqanngitsut.
Malittarisassat nutaat uani atuakkit.
- Eqqarsaannarpunga: Arraa, taanna KNR-imut oqarpoq.
Inersimasut akiuussutissinneqareersut cafémukarsinnaallutillu naluttarfiliarsinnaasut meeqqat tamakkununnga iseqqusaannginnerat qanoq isumqarfigaajuk?
- Ajorinngilara. Kisianni ilaanni tamakkua caféliarsinnaallutik, naluttarfiliarsinnaallutik sutorniartarfiliarsinnaammata kusanaagilaarlugu usoruttarpunga, Inequ oqarpoq nangillunilu:
- Sinngagilaartarpakka, uangami aamma akiuussutissamik kapitikkusukkaluarama tamakkununngarsinnaaniassagama.
Niuertarfiit natiini titarnerit
Aammalu malittarisassat eqqaamasariaqartut amerlaqalutik.
Soorlu niuertarfinni immitsinnut qanippallaaqqusaanngilagut.
- Niuertarfiit natiini titarnerit puigortarpakka. Siumuinnaq isigalunga ammut qiviarneq ajorama takuneq ajorpakka. Taava ataatama anaanamaluunniit oqarfigisarpaannga: Titarneq tikinnagu unittassagavit eqqaamajuk, taava titarnermiit tunuaamisarpunga.
Taava eqqaamasassaqaqaatit?
- Aappi.
Uuminarpa?
- Naamik. Inuit allat corona pissutigalugu malittarisassanik soqutiginninngikkaangata uuminarnerusarpoq.
Taava qanoq misigisarpit?
- Kamaammilaartarpunga: Sooruna taama iliortut? Angerlarsimaannarunik, Inequ oqarpoq.
Inequ oqaluttuarpoq ilaanni corona anngilaanngatigilaartarlugu:
- Inuit qaniminnut assiaqutitik peeraangatigit tangajorlutillu, ikusiminnut tangajunngikkaangata annilaangalertarpunga.
Coronamut tunngasut nipituuliuutigivallaartarnagit
Inuit soqutigitsaakkaangata uuminartarpoq, Inequ isumqarpoq:
- Uangami imminut paarerusullungalu allat paarerusuppakka. Ilaannili inuit iliuuserisariaqakkatik iliuuserineq ajorpaat. Ilaat qanimut assiaquteqarneq ajorput, ikusiminnut quersussanatik inunnullu allanut qanillivallaartarlutik kiisalu napparsimasut angerlarsimasaratik, Inequ oqarpoq.
Illit inersimasut corona pillugu siunnersussagukkit qanoq siunnersussavigit?
- Nipituallaamik oqaluttassanngillat. Nipaatsumik oqaluttarlusi. Ulorianaraangat nipituallaamik oqaluttariaqanngillat. Taava nalinginnarmik oqalussinnaapput, Inequ oqarpoq.
Killilersuutit nutaat sapaatiummat atuutilerput, decmebarillu 5iata tungaanuugallartoq atuuttussaallutik.
