Ineqarnermut akiliuteqartalernissaq assortuussutaasussanngorpoq

Utaqqiissaasumik ineqarnermi ukiortaamiit akiliuteqartarnissamik pilersaarut, kattuffiit Namminersorlutillu Oqartussat assortuussutigisussanngorpaat, isumaqatigiinniarnermut immikkoortoqarfik oktobarip 13-ani ataatsimiigiaqqusimmat.

IMAK isumaqarpoq, utaqqiissaasumik ineqarnermi akiliuteqartoqassappat, tamanna isumaqatigiinniutigineqaqqartariaqartoq.

Peqqinnissaqarfimmi sulisussaaleqineq anigorniarlugu peqqinnissamik sullissisut akissarsiaat isumaqatigiinniarnermi kingullermi 19 procentimik qaffanneqarput.

Peqqinnissamut Naalakkersuisup Agathe Fontainip, Naalakkersuisut siunniussaat tapersersorpaa.

- Peqqissaasut aningaasarsiaasa 19 procentimik qaffannerisa kinguneriniartussaavaa aalaakkaasumik atorfeqarnissaat, taamaattumillu utaqqiissaasumik najugaqaratik aalaakkaasumik najugaqarsinaalissallutik, Agathe Fontain oqarpoq.

Utaqqiissaasumik ineqarallartarnerup peerneqarnissaa Peqqissutsimut Naalakkersuisup assortuussorinngilaa.

- Inuiaqatigiinni kikkut tamarmik najugaqarnerminnut akiliisarput, taannalu pissusissamisoorpoq. Aalaakkaasumik atorfeqalernikkut inissavimminnut pisussaagamik, taava soorunami tassunga akiliisartussaapput, Agathe Fontain oqarpoq.

Peqqissaasut Kattuffiani siulittaasoq, Karin Holler, ilasortami utaqqiisaasumik ineqarnerminni akiliisalernissaannut apeqqummut maanna oqaaseqarumanngilaq.