Ineqarallartarneq: Atorfinikkaluit tunniutiinnartariaqartarput
- Danmarkimi sorlaqarfikka qimallugit, Kalaallit Nunaanni ataavartumik suliffittaarpunga. Utaqqiisaasumik najugaqarnissara qanoq sivisutigissanersoq nalugakku utiinnarnissara toqqartariaqalissanerlugu annilaangassutigaara, tunniutiinnassagumalu tamanna uannut angisuumik ajorsarnerussaaq, taama oqarpoq Nukissiorfimmi atorfilik, Thomas Allan Rasmussen.
Namminersorlutik Oqartussat suliffeqarfiini atorfinitsitsisarneq unittinneqarallassasoq, juunip pingajuanni ukioq manna Naalakkersuisut aalajangiipput. Taama peqqusinerup eqqorpai, utaqqiisaasumik najugaqartinneqartut. Taakku inissiani najugaqatigiinnissaat aalajangiunneqarpoq, ilaatigut inuit imminnut ilisarisimanngitsut najugaqatigiisilerlugit, taama aaqqiineq sulinermut kingunerluppoq:
- Ataatsimut najugaqatigiilernerup kingunerisa ilagaat, suliartoraanni naammattumik nukissaqartannginneq, tassami sulereernerup kingorna kisimiinnissaq ajornarluinnarmat, taama oqarpoq, Thomas Allan Rasmussen. Taanna qaammatit qulissaa maanna Nunatsinniippoq, qaammatit marluk kingulliit allamik najugaqateqarluni.
Utaqqiisaasumik inissiisarnermut aningaasat 37 millionn koruunit siorna atorneqarput. Ukioq mannaannaq Namminersorlutik Oqartussat suliffeqarfiini atorfiit 165-it inuttalerneqarput, atorfinittut amerlanerpaartaat utaqqiisaasumik inimik tunineqarlutik.
Ataatsimut najugaqatigiilersitsineq qinernagu, inissiani najugaqartinneqartut aamma utaqqiisaasumik najugallit, akiliisinneqartalernissaat orniginarneruvoq, qasuersimanani suliartornermit, taama oqarpoq Jens Henrik Nielsen, Nukissiorfimmi atorfilik:
- Ulloq manna tikillugu paasisinnaanngilara, sooq utaqqiisaasumik najugaqartinneqartut akiliisannginnersut. Tassami akiliisinneqartartuugunik inuiaqatigiinnut aningaasartuutaavallaassanngikkaluarput aamma piffissaq ungasinnerusoq isigalugu, Jens Henrik Nielsen oqarpoq.
- Namminersornerup eqqunneqarnera akeqarpoq, taama oqarpoq Aningaasaqarnermut Naalakkersuisoq, Palle Christiansen, aasaq aalajangerneqarmat Namminersorlutik Oqartussat suliffeqarfiini atorfinitsitsinermik unitsitsigallartoqarnissaa aalajangerneqarmat. Neriorsuutigaali inuiaqatigiit sullinneqarat eqqorneqassanngimmat.
- Angerlarsimaffimmi qasuersaanngittarnerup kinguneraa, suliffinni eqeersimaanngittarneq. Suliama pimoorussassartaat ilaatigut nukissaqarfigineq ajorpakka, angerlaraagama qasuersaanngittarnerma kinguneranik, Thomas Allan Rasmussen naggasiivoq.
