Indonesiami innermik anititsisumit arsat 5 kilometeritut qutsitsigisumut qullaatitertut
Indonisiami qeqertami Sumatrami innermik anitsisartup Sinabungip innermik anitsinerani arsat kilometererpaalunnik qutsitsigisumut qullaatiterput.
Inunnik ulorianartorsiortoqanngitsoq illullu aseruatiternissaannut aarlerinartoqanngitsoq, Indonesiami oqartussat nalunaarput. Innermik anitsisup eqqaaniittunik aamma qimagussuutsitsisoqaqqusinngilaq. Isumannaallisaanerli eqqarsaatigalugu innermik anitsisumiit kilometerit tallimatut isorartutigisup iluani killeqarfeqarpoq.
Innermik anitsinerup timmisartuussinernut akornutaaneranik suli nalunaartoqanngilaq.
Innermik anitsisartoq 2.460-meteritut portutigisoq ukiuni hunnorujukkuutaani arlalinni innermik anitsisimanngilaq, inuilli marluk 2010-mi innermik anitsinerani ajunaarput.
Sukkut tamaanali tamatuma kingorna innermik anitsisarsimavoq, inuillu 23-t 2014-mi 2016-milu innermik anitserujussuarnerani ajunaarput. Tamaani ilaqutariit 2000-nit ikinnerunngitsut ukiuni kingullerni innermik anisitsisoqartarnerani qimagutitinneqarsimapput.
- Uloriarnartorsiornerusoqalernissaanik ilimanaateqanngilaq, Indonesiap ujarassiornermut pisortaqarfia nalunaarpoq.
AAMMA ATUARUK Indonesiami inuit tuusintilikkuutaat qaqqap anitsinerani qimarrattut
Innermik anitsinermit arsat 5 kilometerit qutsitsigisumut qullaatiterput.
Indonesiami innermik anitseriaannaat 130-upput. Indonesiami qeqertat Manerassuup innermik anitsisartoqarfissuaniipput, taamaammat tamaani innermik anitsisartut lavamik anitserujussuarlutillu tamaani nuna sajukkajuppoq.
Indonesiami sapaatit akunnerani uani marlunngornermi aappassaanik innermik anitsisoqarpoq. Qeqertat pingaarnersaanni Javami innermik anitsisartoq Merapi lavamik ataasinngornermi anitsivoq.
Indonesia 255 millionit missaannik inoqartoq nunarsuarmi qeqertarpaaqarfiunerpaavoq. Tamaani qeqertat Sumatra, Java, Sulawesi, Bali Borneomilu qeqertaq Kalimantan saniatigut allanik 13.677-inik qeqertaaraqarpoq.