Indonesiami nunap sajoqattaarnerata kingorna inuit angerlarusunngillat
Indonesiami illoqarfiit pingaarnersaanni illorsuit orraalermata inuit majuartarfikkut qimarrapput. Qeqertap Sumatrap kitaani inuit sinerissamiit timmut potunersiorlutik qimarrapput, sulilu maannakkut silaannarmiillutik tassaarsuaqarnissaanik aarleralutik, sulimi nuna sajuppillattarmat, 2004-milu juullikkunni tassaarsuaqarnera suli eqqaamanearluarmat. Ippassaq nunap sajunnera ukioq manna silarsuarmi sakkortunersaalluni richterip uuttuutaani 8,4-mik sakkortussuseqarpoq, Thailandimi, Malaysiami Singaporimilu malugineqarsimalluni, Indiap imarpiani, nunap sajunnerata qeqqaniit 2000 km-nik ungasitsigisumi, Sumatramiit kujammut kimmut 130 km-nik ungasitsigisumi. Unnuap ingerlanerani arlaleriarluni tassaarsuaqarsinnaaneranik aarlerisaarisoqaqattaarpoq, Sri Lankami Afrikallu kangiani aamma tusaaneqartunik, Sumatramili malliulaaginnarsimalluni. Aseruinerit pinerupput illoqarfinni Sumatrap kippasinnerusortaani. Indonesiamili pisortat nalunaarput ilimagisamiit aseruinerit annikinnerusut. Manna tikillugu inuit qulit toqusimapput ikiuijartortullu tikippaata illullu aserornikut misissorneqalerpata toqusut amerlanerit nassaarineqassangatinneqarput.
Ullumi Indonesiami tassaarsuaqarsinnaaneranik aarlerisaarisoqaraluarpoq, qeqertap Sulawesip kujataata kangiani richterip uuttuutaa malillugu 6,4-tut sakkortutigisumik nuna sajuppillammat.
