Indiap qeqertaanni CO2-mik mingutsitsinnginneq angunialerpaat

Indiap Imavittarsuani qeqertat ataatsimoortut Maldiverne silap allanngoriartorneranit navianartorsiortinneqarput. Qeqertat immamit 2 meteriinnarnik qaffasinnerusumiipput, imarlu qaffariaamissagaluarpat qeqertat uligussaasussaapput. Taamaattumik qeqertani præsidentiusup Mohamed Nasheedip qeqertat kiattorsuarmiittut taakkua naalagaaffittut siullerpaallutik CO2-mik mingutsitsiviunnginnissaat ullumi nalunaarutigaa.
Allattoq Lotte Holm
marsip 16-at 2009 14:19

Aqqartartut ornigannaarsuat Maldiverne koraalinit qeqertannguuttunit 1200-uusunik qeqertaqartut, katillugit 385.000-inik innuttaqarput. Pilersaarummi annertuumi anorisaatit 155-it sananeqassapput, seqinisaatit katillugit kvadratkilometerip affaatut annertussusillit illut qaliaannut ikkussorneqassallutik, aamma qaqqortariarsuit qalipaannik ikuallaavimmik nukissiuutiliortoqassaaq. Motoorit benziinatortut solaaritortullu motoorinik innaallagiatortunik taarsersorneqassapput.

- Maldiverne tunniutiinnarsinnaagaluarput. Silap pissusaata allanngoriartorneranit eqqugaasutut qimaasutut nalunaarutigiinnarsinnaagaluarpugut arlaannullu inissinneqarnissarput piumasaralugu. Naalakkersuisunngortulli nutaat CO2-mik mingutsitsiunnaarnissamut pilersaarusiornissaq toqqarpaat, Nasheed nutaarsiassaqartitsivimmut Observerimut oqarpoq.

- Silap pissusaata allanngoriartornera nunarsuarmi ajornartorsiutaavoq. Nunarsuaq uummamminik unittoornissaminik ulorianartorsiorpoq, uagullu nalinginnaasumik nuffasersimasutut pivarput. Maldiverne naalagaaffittut avatangiisinik mingutsitsinnginnerpaatut pilersaaruteqarlutik ullumikkut saqqummiussipput. Naalagaaffiit allat aamma taamaaliornissaat neriuutigiinnassavara, præsident Nasheed ullumi taama oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq