Indiamiut sorsuutaata ujajaaniat kivisippai.
Indiamiut umiarsuarmik sorsuummik, INS Tabarimik, Somaliap avataatigoorlutik kangerliumanermut pulaniarlutik ujajaaniat umiarsuaaraat, angallatinik sukkasuulianik marlunnik kalitalik takugamikku uneqqusimagaluarpaat. Ujajaanialli qaartartunik saassussiniarlutik qunusaarilermata eqqaasilerlutillu, kiisalu umiarsuaaqqap qaani qaartartunik igeriuttakkanik piareersaalersut takugamikkit akillugit eqqaakkamikkit qaartartuusiviat eqqorlugu umiarsuaaraq qaartippaat. Umiarsuaaraq kivimmat inuttai angallatinik sukkasuulianik kalitaminnik qimaasut malersoraluaramikkit, kingusinnerusukkut angallateeqqap aappaa inuttaqanngitsoq kisiat nassaaraat.
Tusagassiuuteqarfimmi Ritzauimi ullumi aamma allaaserineqarpoq, EU-miit umiarsuait sorsuutit tallimat arfinillilluunniit decembarip ulluisa arfineq pingajuanniit, Somaliap avataani alapernaarsuilissasut. Frankrigip illersornissamut ministeria, Herve Morin ullumi aamma oqarpoq, Naalagaaffiit Peqatigiit assartuutaasa EU-miit sorsuutit ingiallortigisalissagaat, kiisalu umiarsuit alapernaarsuisut timmisartunik ikiorteqartassasut. Naalagaaffiit Peqatigiit assartuutaat nerisassanik 35.000 tonsini, Somaliami kaattut qaammatit tamaasa pajuttarpaat. Taakkualu aamma ujajaaniat arlaleriarlutik saassuttareerpaat. Manna tikillugu EU-mi ilaasortat, Frankrig, Tysklandi Spanialu alapernaarsueqataaniarlutik nalunaareerput. Norgeli aamma EU-mut ilaasortaanngikkaluarluni alapernaarsueqataasitsiniarluni neriorsuivoq. Ilanngutassiaq Ulf Fleischerimit kalaallisuunngortinneqarpoq.
