Inatsit nutaaq ujartorpaa

Silaannarmik mingutsitsineq akiorniarlugu nunatsinni nutaanik inatsisiliortoqartariaqartoq Avatangiisinut Naalakkersuisoq isumaqarpoq.

- Biilit motoorii ingerlatiinnarlugit uninnganeq inerteqqutaalertariaqarpoq, pisariaqassappallu orsussamut aki qaffattariaqassalluni, Ark’alo Abelsen oqarpoq.

- Isumaqarpunga pissusipalaajusoq, tassami nunarsuarmioqatigut suliffissuaatillit aammalu CO2-mik aniatitsiffiusut taakku ajorersuataartarpagut, nunatta silaannaata pissusaata allanngoriartorneranut pissutaatillugit. Nalunngilarpummi taakku pisooqataanerpaajusut, kisianni aamma uagut immitsinnut qiviartariaqarpugut, Ark’alo Abelsen oqarpoq.

Isumaqarpoq biilit uninngaannartut ilaannikkut tiimerpassuarni CO2-mik pisariaqanngilluinartumik aniatitserujoortartut.

- Pissuseq unittariaqarpoq, isumaqarpungalu ungasissorsuunngitsukkut eqqarsaatigisariaqartoq inatsisiliortortariaqarluta tamanna inerteqqutinngortillugu.

Avatangiisinut Naalakkersuisoq isumaqarportaaq pisariaqassappat motoorinut orsussap akia qaffattariaqarsinnaasoq.

Assersuutigalugu benzinap nunatsinni akia liiterimut ullumikkut 3,77 koruuniuvoq Danmarkimi pingasoriaammik akeqartoq.

- Aa, isumaqarpunga benzinap akia ajunngilluinnartoq, kisianni iluaqutaassappat eqqarsaatigisariaqarparput siunissami immaqa benzinap akitsuusertariaqarnera, taamaasilluta asuli biilit uninngaannarlutik silaannarmik mingutsitsinerat millisinnaassagatsigu.

Ark’alo Abelsenip tassani eqqarsaatigatigaa inuit biilitik qimalerunikkit qamillugit ingerlatiinnarnagit ilikkassappassuk, orsussamik akitsuusiineq aqqutaasariaqalersinnaasoq, kisianni aalisartut piniartullu eqqornagit.

- Una illuatungiliuttuaannarpoq piniarnermik aalisarnermillu inuussutissarsiuteqartut umiatsiaararsortorpassuit aalisartullu eqqorneqassannginnamik nutaamik aaqqissuussisoqassappat.

Avatangiisinut naalakkersuisup pinngitsoornagu eqqarsaatigeqqissaagassaagaanerarpaa, qanoq-ilillugu aaqqeriarneqarsinnaanera.

- Imaattariaqanngilaq aaqqissuussinermik eqqussissasugut aningaasat isertitsissutaasuninngarnit aningaasartuutit angininngorlugit.

Ark’alo Abelsenip biilit motooriisa qamittarnissaat pillugu piaartumik inatsisiliortoqarnissaa angorusuppaa.