Inatsit nutaaq tarnimikkut nappaatillit inatsisitigut inissisimannerannut pitsaannguutaasussaq
- Nutaamik inatsiseqalernikkut napparsimasut atugaat malunnaatilimmik pitsanngoriaateqartinneqarput. Inatsimmi napparsimasut ataasiakkaat, sapinngisaq tamaat katsorsartinnerminnut, imminnullu tunngasunut allanut, peqataatinneqarnissaat sunniuteqartinneqarnissaallu qulakkeerneqarpoq. Tamatumunnga peqatigitillugu peqqinnissaqarfiup immikkoortuisa arlaannut unitsitaanermut-, uninnganermut- katsorsartinnermullu atatillugu pinngitsaaliissummik iliuuseqarsinnaanermut piumasaqaatit sukateriffigineqarput, Peqqissutsimut Attaveqarnermullu Naalakkersuisoq Steen Lynge oqarpoq.
Maannamiit Tarnimikkut nappaatillit pinngitsaaliissummik unitsinneqartut imal. allatigut pinngitsaaliissummik iliuuseqarfigineqartut, tarnimikkut nappaatilinnut immikkoortortaqarfimmi uninnganermut tunngassuteqartut suugaluit pillugit, ikiortissaminnik siunnersorteqartinneqartalissapput.
Tamatuma saniatigut tarnimikkut nappaatillit pinngitsaaliissummik unitsitaaneq-, pinngitsaaliissummik aalaakkigaaneq-, pinngitsaaliissummik nakorsaatitortinneqarneq-, qupinnguallatsinneqarnikkut katsorsartinneq- allatigullu pinngitsaaliissummik iliuuseqarfigineqarneq pillugit maalaarutaannik immikkut aalajangiisartoqalerpoq.
Inatsisartut inatsisaata matuma tarnimikkut nappaatillit napparsimavimmi uninngasarnerat pillugu inatsit 1938-imeersoq taarserpaa. Tarnimikkut nappaatillit pillugit nutaamik inatsiseqalernikkut, napparsimasut isumannaatsumik sullinneqarnerisa pitsaassusaa annertuumik qaffanneqarpoq.
” Tarnimikkut nappaatilinnik nammineersinnaajunnaarsitsineq allatigullu pinngitsaaliissummik iliuuseqarneq pillugu Inatsisartut Inatsisaat” nittartakkami www.lovgivning.gl atuarneqarsinnaavoq.
