Inatsit nutaaq malunnartinniarlugu naalagiaqatigiipput
Tamanna ullaap tungaani qulinut Nuummi Annaassisitta Oqaluffiani naalagiaqatigiinnikkut nalliussineqarpoq. Nalliuttorsiornermi naalagiaqatigiinnissaq sioqqullugu, ilaatigut biskop Sofie Petersen aamma ilageeqarnermut naalakkersuisoq Mimi Karlsen peqatigalugit, biskopip allaffianit Annaassisitta Oqaluffianut ingerlaaqatigiittoqarpoq.
Ualermannalu Hans Egedep Oqaluffiani kaffillertoqarpoq.
Namminersorneq pillugu inatsit peqatigalugu, ilagiinnut inatsisikkut nutaakkut Nunatta ilagiinnut tunngasut tamaasa Danmarkip naalagaaffianit tigussagai aalajangersarneqarpoq aamma taamaalilluni biskop Sofie Petersen nutaamik sulisitsisoqalerpoq. Maannami Namminersorlutik Oqartussat ataanni atorfeqalissaaq.
Tamatumunnga peqatigitillugu ilagiinni allaffissornikkut suliassat Namminersorlutik Oqartussanit, biskopip allafffeqarfianut nuunneqarput. Taamaallaat inatsisiliornermut tunngasut ilagiinnut Naalakkersuisoqarfimmiiginnassapput.
- Taamaalilluni ilagiinni atorfillit ilagiinni sunniuteqarsinnaanerat ajornannginnerulissaaq, inatsit Inatsisartuni maajimi akuersissutigineqarmat, Mimi Karlsen taama oqarpoq.
