Angallannermut inatsisip nutaap atuutilersussap, ilaatigut biilertilluni qitequteqartarnissamik peqqussuteqartup, atuutilernissaa ukiup affaanik kinguaattoorsinnaavoq.
Namminersornerullutik Oqartussat, Inatsisinut atortitsinermut ministeriaqarfimmit ippassaq akissutisiaat tiguneqartoq naapertorlugu, inatsit atuutilissappat, aatsaat 2007-ip naanerani atuutilersinnaassaaq.
Ukiaanerani inatsisartut ataatsimiinnerminni angallannermut inatsit akueralugu naammassinngippassuk, atuutilersinnaanera kinguaattoorsinnaasoq, Inatsisinut atortitsinermut ministeriaqarfik nalunaarpoq.
Angallannermut inatsit saqqummiunneqaqqaarmat, inatsit qamuteralannut tunngasoq isumaqatigiinngissutigineqarpoq. Qamuteralannik atuisinnaasut ukiuisa 16-iniit 18-inut qaffatsinneqarnissaat, tassani isumaqatigiinngissutaavoq.
Angallannermut inatsisissap kinguaattoorsinnaanera pillugu, Inatsisartuni inatsiseqarnermut ataatsimiititaliap aqagu ataatsimiissutigissamaarpat.