Inatsisitigut sukaterinermik kissaateqartoqarsinnaavoq
Umiarsuup takornarianik angallassissutip Bremen-ip ilulissat akornanni gummibådinik navianartumik tallimanngormat angallassisimanera Ilulissat Kangerluani angallanneq pillugu inatsisitigut sukaterisoqarneranik kinguneqarsinnaavoq.
Gummibådit arlalissuit tamarmik immikkut qulinik aqqaneq-marlunnillu ilaasullit ilulissat akornanni tallimanngormat angalaarsimapput, tamatuma nalaani angallannikkut pissutsinik ilisimannittunut ernumaammertitsisumik.
Iluliarsuaq assakassagaluarpat nakkaalluniluunnit angallammik kinngutitsisinnaavoq ajunaarnermik kinguneqartumik.
Umiarsuaq takornarianik angallassisoq Bremen gummibådit atorlugit nammineerluni ilulissat akornanni angalatitsisimavoq, naak taamaaliornissaq Nunatsinni Takornariaqarnermi Inuussutissarsiornermilu Siunnersuisoqatigiinnit inassutiginartinnagu apuunneqareeraluartoq.
- Suliassaq ilungersunartutut isigaarput, ajutoorujussuartoqarsimasinnaagaluarmat. Taamaattumik Ilulissat Kangerluani angalasarnerup navianartui pillugit umiarsuarnut takornarianik angallassisunut qanoq ililluta pitsaanerusumik inassuteqartalernissarput oqaluuserisariaqassavarput. Nunatsinni Takornariaqarnermi Inuussutissarsiornermilu Siunnersuisoqatigiinni paasissutissiinermut ataqatigiissaarisoq Malik Milfeldt oqarpoq.
Nunanik allaneersunik umiarsuarnik takornarianik angalatitsisartut marluk Nunatsinni Takornariaqarnermi Inuussutissarsiornermilu Siunnersuisoqatigiinnit maanna allaffigineqareerput, gummibådinik atueqqusinani inassutitalimmik.
Gummibådinik atuisinnaanermik inerteqquteqanngikkaluarpoq, pisimasorli umiarsuit takornarianik angallassisarnerat pillugu nunatsinni ataatsimiititaliami oqaluuserineqartussanngorpoq.
Gummibådinillu angallassisarnermik inerteqqusiortoqarnissaanik inassuteqarsinnaanertik mattussinnaanagu Malik Milfeldt oqarpoq.
Namminersornerullutik Oqartussat Ilulissat Kangerluata Kangiatalu eqqissisimatinneqarnissaat pillugit nalunaarutaanni piumasarineqarpoq, takornarianik imaatigut angallassineq aatsaat pisinnaasoq, Kalaallit Nunaanni pinngortitamik ilisimannittunik aamma pinngortitamik illersuineq pillugu inatsisinik ilisimasaqartunik ilisimasortanik atuinikkut.
Maleruagassarli tamanna unioqqutinneqarsimanngitsoq Malik Milfeldt isumaqarpoq, eqqissisimatitap avataani angallassisoqarsimanerarneqarmat.
