Inatsisileritooq Mads Pramming inatsisitigut ataataqanngitsunut eqqartuussissuserisuussaaq. Kalaallit meeqqat 22-t misiliutaasut utoqqatserfigineqarnissaanni taarsiivigineqarnissaannilu eqqartuussissuserisuusimavoq.Assi: Scanpix

Inatsisitigut ataataqanngitsut utoqqatserfigineqarnissartik inatsimmillu allannguinissaq kissaatigaat

Inatsisitigut ataataqanngitsut arlallit inatsimmik allannguinissaq naalagaaffimmillu utoqqatserfigineqarnissartik kissaatigaat. Aningaasanillu taarsiivigineqarnissamut periarfissiisoqartariaqartoq Kattuffik Ataata-mi siulittaasuusimasoq Tida Ravn oqarpoq

Kalaallit Nunaanni inatsisitigut ataaqanngitsut naalagaaffimmit utoqqatserfigineqarlutillu taarsiivigineqartariaqarput.

Kattufik Ataata-mi siulittaasuusimasoq Tida Ravn oqarpoq.

- Tamanna isumassarsiatsialaavoq. Inatsisitigummi ataataqanngitsorpassuaqarpoq, ataatamik ilaqutaanit ajornanngippat akuerineqarlutillu ilaqutaasutut isigineqalerusuttunik, Tiida Ravn KNR-imut oqarpoq. Inatsisitigut ataataqanngitsut katissimanngitsunik angajoqqaaqarput. 2014 sioqqullugu inatsisitigut ataatamik kinaassusersisinnaatitaaneq kingornussisinnaatitaanerlu ajornarsimapput.

Tamanna ukiut arfineq pingasut matuma siornagut allanngortinneqarpoq, inatsisitigut ataataqanngitsut ataataassutsimut inatsit aqqutigalugu ataataqarnissamut pisinnaatitaaffeqalermata, kinngussisinnaatitaalerlutik ataatarisamillu kinguliaanikkinguliaqarsinnaatitaalerlutik. Kisianni inatsit taanna allanngorteqqittariaqartoq Tida Ravn isumaqarpoq.

Sutigut tamatigut naligiissitaaneq

Inatsisitsigut ataataqanngitsut ataataasup toqukkut qimaguttup pigisaanik kingornussinissaq aalajangersaavigineqareersimatinnagu kingornussisinnaatitaapput. Kingornussineq imaluunniit  naalagaaffimmit aningaasanik taarsiivigineqarneq inatsimmi tassani toqqagassaasariaqartut, Tida Ravn oqarpoq.

- Tamanna isumassarsiatsialaavoq. Inatsisitigummi ataataqanngitsorpassuaqarpoq, ataatamik ilaqutaanit ajornanngippat akuerineqarlutillu ilaqutaasutut isigineqalerusuttunik. Kingornussisoqassatilluguli qatanngutitaanut aningaasanik tunniusseqqusinissaq tamatumunnga iluaqutaanavianngilaq. Nangipporlu:

-Naalagaaffiup imaluunniit danskit naalakkersuisuisa naligiissinniarunisigut, sutigut tamatigut naligiissitsinissaat siunertariuaannarnikuuarput. Tassani ataatamut toqukkut qimaguttumut kingornussisinnaatitaannginnermut taarsiullugu aningaasanik taarsiivineqarsinnaanerup periarfissaannginnera ajornartorsiutaavoq. Tida Ravn oqarpoq.

Klaus Frederiksenip inatsisitigut aamma ataataqanngitsuusup suliaq ingerlateqqippaa aningaasanik taarsiissuteqartoqarnissaa siunertaralugu. Klaus Ferederiksen:

-Tassa isumaqaratta suliap matuma naammassineqarnissaanut massakkut piffissanngortoq, ilisimagatsigulu qallunaat naalakkersuisuisa naammassinissaanut soqutiginninnerat qanoq annikitsigisoq, taamaattumik aaalajangersimavugut naalagaaffik eqqartuussivimmut tunniunniarlugu.

Pisortatigoortumik utoqqatsertoqartariaqarpoq

Taassuma neriuutigaa suliaq naalagaaffiup pisortatigoortumik utoqqatserneranik aamma malitseqarumaartoq. Kingornussisarnermi inatsit kingornussisussaatitaanerlu inissinneqareerpata pisortatigoortumik utoqqatsertoqarnissaa Tida Ravnip aamma kissaatigaa.

- Kissaatigiuaannarnikuuarput naalagaaffiup sumiginnaasimanini kiisalu inatsisip amigaataanera pissutigalugu amerlasuut sumiginnagaasutut annaasaqartutullu misigisaqartitaasimanerat nassuerutigissagai.

Sammisaq aviisimi Kristeligt Dagbladimi sapaatip akunnerani uani aamma allaaserineqarpoq.

Inatsisilerituup Mads Prammingip inatsisitigut ataataqanngitsut ilaasa naalagaaffimmit aningaasanik taarsiivigineqqunissaat pillugu suliami eqqartuussissuserisuunissi uppernarsarpaa.

- Qularutiginngilara inuit pisinnaatitaaffiini immikkoortut arfineq pingajuat tunngavigalugu ilaqutaqarnissamut pisinnaatitaaffik uani unioqqutinneqartoq. Immikkoortoq kingornussisarnermik imalik, kinaassutsimik ilaqutariinnermullu tunngasunik aamma imaqarpoq. Kikkunnit kingoqqisuunermik angajoqqaallu kikkuunerinik ilisimatitsinnginneq inuit pisinnaatitaaffiini immikkoortut arfineq pingajuanni kannguttaatsuliornertut taaneqarpoq. Taannalu tunngavigalugu eqqartuussivitsigut suliassanngortitsisoqarsinnaavoq. Mads Prammingip eqqartuussivilersuussinissaq aallartisarnerarpaa.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl