Aviisi: Inatsisitigut ataataqanngitsut Naalagaaffik eqqartuussivilersuunniaraat
Kalaallit inatsisitigut ataataqanngitsorpaat Naalagaaffimmik eqqartuussivilersuiniarnertik eqqartuussivik qaangiinnarlugu Danmarkimili eqqartuussisuuneqarfiit ilaannut, tassa Østre Landsretimut suliassanngortinniaraat, aviisi Sermitsiaq.AG allappoq.
Taakkulu aningaasartuutiginngisamik eqqartuussivilersuinissamut Danmarkimi inatsiseqarnermut ministereqarfimmit aamma akuerisaapput. Tassa eqqartuussivilersuinerannut aningaasartuutit, eqqartuussissuserisuata tamatumani suliaq pillugu aningaasarsiassai ilanngullugit, Naalagaaffiup tamaasa akilissavai.
Tamanna inatsisitigut ataataqanngitsut eqqartuussivilersuinerminni aamma ajorsassagaluarpataluunniit aamma atuutissaaq.
Ministereqarfiup akuersinera isumalerujussuusoq, Inatsisitigut ataataqanngitsorpaat eqqartuussivilersuiniartut oqaaseqartartuat Klaus Frederiksen Sermitsiaq.AG-mut oqarpoq.
- Assut uagutsinnut toqqissiallannarpoq suliap Østre Landsretimi ingerlanneqartussanngornera, tassami matut taamaalillutik ammarneqarput ajorsassagaluarutta eqqartuussiviit qullersaannut ingerlatsisinnaanissatsinnut, tamanna pisariaqalissagaluarpat. Aamma uagutsinnut toqqissiallannarpoq Naalagaaffiup ataani ingerlatsivimmit isumalerujussuarmik aningaasartuutiginngisamik eqqartuussivilersuinissamik isaassiffigineqarnerput.
Inatsisitigut ataataqangitsunut ataatassarsiornissamik pisinnaatitaaffeqarsimanngitsunut utoqqatserniarnatik Danmarkimi naalakkersuisut nalunaarnerisa kingorna, inatsisitigut ataataqanngitsoorpaat Naalagaaffimmik eqqartuussivilersuiniarlutik aalajangertut maannamut 26-upput.
