Inatsisitigut ataataqanngitsoq peqatigiiffilorusuppoq
Tamakkulu ilaatigut pissutigalugit, inatsisitigut ataataqanngitsut oqaaseqartartuata, Tida Ravnip peqatigiiffik nutaaq aallartinniarlugu pilersaarutigalugu.
- Inuit sutigut tamatigut killiligaanngitsumik pisinnaatitaaffitik naapertorlugit inooqataanissaat pingaaruteqarmat aamma innuttaasutut inooqataanermi sutigut tamatigut inuiaqatigiinni pisuni tamat oqartussaaqataanerat tunngavigalugu sunniuteqarnerunissaq sulissutigisariaqarmat, kattuffiliornissaq imaluunniit soqutigisaqaqatigiiffimmik pilersitsinissaq pisariaqarpoq, Tida Ravn tusagassiutinut nalunaarummini taama allappoq.
Taassuma inuit inatsisitigut ataataqanngitsut anaanaqanngitsullu taamatullu allatigut pisinnaatitaaffimmikkut immikoortitaallutik pineqartut kaammattorpai peqatigiiffimmut tapersersuinissaannik.
- Naatsumik oqaatigalugu, inuit kalaallit nunaanni pisinnaatitaaffiisigut sutigut tamatigut illersorneqarnissaat qulakkeerneqassappat, ataatsimoorfissatsinnik pisortanillu akuerineqartumik pilersitsisoqarnissaa pisariaqarpoq. Tida Ravn allappoq.
Inatsisitigut ataataqanngitsut anaanaqanngitsullu allallu pisinnaatitaaffimmigut immikoortitaallutik pineqartut ataatsimiigiaqquneqarput, arfininngorneq februaarip 14-anni, nalunaaqutaq pingasup qeqaaniit arferngup qeqqata tungaanut, tamannalu pissaaq Nuummi Blok 6-mi peqatigiiffiit ataatsimiittarfianni.
