Inatsisit nutaanngilisut pillugit kommunit assigiinngitsunik nassuiaateqarput

Naalakkersuisut siulittaasuata Naalakkersuisoqarfiani pisortap, Søren Hald Møllerip KNR-imut pingasunngormat oqaluttuaraa, ileqqoreqqusat allanngortiterneri ukioq manna aasap qeteqqunnerani kommuninit naammassineqarlutik suliarineqarnissaat neriuutigineqartoq naak tamanna siullermik suliakkiutigineqarmat aprilip aallaqqaataa nallertinnagu naammassineqareersimasussatut oqartussanit piumasarineqaraluartoq.

Tamannali killiliussaq Qaasuitsup Kommunianit Qeqqata Kommunianillu naammassineqarsinnaanngitsutut maanna nalilerneqarpoq.

Qeqqata Kommuniani pisortaanerup, Panêraq Olsenip KNR-imut oqaatigaa, Nammisorlutik Oqartussat kommunillu suleqatigiinneri pitsaanerusuuppata suliaq imaaliallaannaq naammassisinnaassagaluartoq.

- Ileqqoreqqusanut tunngasut suliat ingerlappavut. Kisianni qujanassagaluarpoq ileqqoreqqusanut tunngasut Namminersorlutik Oqartussanut suliakkiutivut, erngerlutik suliarisartuuppatagit taamaalilluni sulinerput pilertornerusumik pisassagaluarmat.

Panêraq Olsen oqarpoq naqissuserlugu oqaatigalugu ileqqoreqqusanut tunngasut atuutsinneqalinnginnerini tamakku oqartussanit piffissaq sivisooq atorlugu aalajangersarneqaqqaartarmata tamannalu pissutigalugu kommunit sulineri arriitsutut isigineqartartoq.

- Tassa sapinngisarput naapertorlugu tamakku naammassiniarsarissavagut. Kisianni nammassissagutsigit Namminersorlutik Oqartussat kommunittalu suleqatigiinneri pisariaqarpoq. Aatsaallu suleqatigiikkutta tamanna naammassineqarsinnaavoq, Panêraq Olsen oqarpoq.

Qaasuitsup Kommuniani borgmesterip, Ole Dorphip KNR-imut oqaatigaa, ileqqoreqqusat nutarterneqarneri kommunimit ingerlaavartumik suliarineqartut. Taamaakkaluartorli oqartussat piffissaliussaat nallertinnagu naammassineqarsinnaaneri naatsorsuutigineqassanngitsoq oqarluni.

Kommuneqarfik Sermersuumi borgmesterugallartup, Justus Hansenip neriuutigaa, piffissaliussaq nallertinnagu ileqqoreqqusat nutarterneqarneri naammassineqarsinnaasut.

- Sulinerput aallartereerparput naatsorsuutigaaralu piffissaliussaq, tassa aaasap qiteqqunnera nallertinnagu taakku naammassereersimanissaat.

Justus Hansen oqarpoq naqissuserluguli suliaq tamanna annertuupilussuusoq.

- Eqqarsaatigineqartariaqarpormi uangut kommunerput kitaaniit kimmut Tunu ilanngullugu kommunerujussuummat sumiiffinnilu taakkunani pissutsit allaassuseqartarlutik naleqqusarneqartussaasarmata.

Kommuneqarfik Sermersuumi borgmesteriugallartoq, Justus Hansen oqarpoq.

Qeqqata Kommuniata taamatullu Kommuneqarfik Sermersuup naatsorsuutigaat ukioq manna naatinnagu naammassereersimassallutik.

Kommuni Kujalliup borgmesteria, Jørgen Wæver Johansen ullumi tallimanngornermi pisoq pillugu oqaaseqartinniaraluarparput iluatsinnatiguli.