Inatsisit atortinneqarfiata pitsanngorsaavigineqarnissaa taperserneqartoq

Dansk Folkeparti Kalaallit Nunaata eqqartuussiveqarneranut maannakkut pitsanngorsaanissamut piareersimavoq, tamatumuunalu arlalinnik suliniuteqarusulluni.

Partiip inatsisinut tunngasunut oqaaseqartartua, Folketingimilu inatsisinut ataatsimiititaliami siulittaasoq, Peter Skaarup Nunatsinni inatseqarnermut pissutsit pillugit sapaatip akunnerata siuliani tusarniaasoqarnerani peqataareerluni KNR-imut taama oqarpoq.

Nunatsinni Danmarkimilu eqqartuussiveqarnerit assigiinngitsuusut taassuma nassuerutigaa.

- Maanna iliuuseqarfigineqartariaqartut suliarineqarniassammata, isumagineqartariaqartunik pingaarnersiuinissaq pisariaqarpoq. Aammattaaq aningaasartuutigerujussuarnagit, Peter Skaarup oqarpoq.

DF: Piaartumik pineqaatissiineq pinerluffigineqartunullu aningaasaateqarfik pilersinneqartariaqarput

Dansk Folkepartip eqqartuussiveqarnermi pingarnertut ukkatarisaani pinerluuffigineqartut ilaapput. Taamaammat naalagaaffik Kalaallit Nunaanni pinerluffigineqarsimasunut aningaasaateqarfimmik piaartumik pilersitsisariaqarsoraa.

Taamanna Inuit Ataqatigiinneersup Aaja Chemnitz Larsenip tusarniaasoqarneranut atatillugu saqqummiussaani ”Kalaallit Nunaat toqqissisimanarnerusumi” siunnersuutinut ilaavoq.

- Pinerluffigineqarsimasut pinerluttoqarneraniillu eqqugaasut ukkatarineqarnerunissaat pisariaqartinneqarpoq. Tassanilu pinerluffigineqarsimasunut aningaasaateqarfik pilersinneqarsinnaavoq. Tamanna piumasaqaatitaqanngitsumik tapersersorsinnaavarput, suliniuteqartoqartariaqarlunilu, Peter Skaarup oqarpoq.

Danmarkimi atuuttut assersuutigeriarutsigit eqqartuussivinni suliani qajassuaatsumik angallannermi nakuusernernilu pinerlussimanermik pineqaatissinneqarsimasut pinerluffigineqarsimasunut aningaasaateqarfimmut 500 koruunimik akiliisussaatitaapput. Pinerlunnermik eqqugaasimasut katsorsartinnissaannut aningaasat atorneqarsinnaapput.

Aamma Inuit Ataqatigiit siunnersuutaat alla, tassalu piaartumik pineqaatissiinerusarnissamut siunnersuut, Dansk Folkepartiip taperserpaa.

- Kalaallit eqqartuussiviini takkutinngitsoortartut sulianilu nassuertoqareertuni piaartumik pineqaatissiinissamik periarfissaqannginneq ajornartorsiutaapput. Tassanilu piaartumik pineqaatissiinerit atuutilersinneqarsinnaapput, eqqartuussisuniillu naammassineqarsinnaasassallutik. Taamaalilluni suliassarpassuit naammassineqarsinnaapput. Tamannalu tapersersorneqaannarsinnaavoq, Peter Skaarup oqarpoq.

Socialdemokratiit: kommunefogedit amerlanerusut

Inatsiseqarnermut ministerip Søren Pape Poulsenip (K) tusarniaanermi Nunatsinni eqqartuussiveqarnerup aningaasanik maannakkut immikkoortitsivigineqarnissaa tusarniaasoqarnerani neriorsuutigigerusunngilaa. Siunnersuutilli ammaffigai.

Socialdemokraatiniillu Lars Aslan Rasmussenip kommunefogedit amigaataanerat isornartoqartinneruaa.

- Kalaallit Nunaanni nunaqarfinni oqartussaqannginnera maluginiarneruara. Tamannalu ajornartorsiutaavoq, tassami eqqartuussisoqanngilaq inatsisillu malinneqarnatik.

Aaja Chemnitz Larsen naalakkersuisut Nunatsinni eqqartuussiveqarnermut pitsanngorsaanissaanissamik pisussaaffilernissaannik aalajangiiffigisassatut siunnersuuteqarniarpoq. Dansk Folkepartip Socialdemokraatillu siunnersuummik tapersiiniarnerlutik neriorsuutigereersinnaanngilaat.