Inatsisissatut siunnersuutip oqallisigineqarnissaa kinguartinneqarsinnaavoq
Aningaasanut inatsisissatut siunnersuutip nutaap sipaarniutinik nutaanik allannguutinillu imallip, Inatsisartut aningaasanut ataatsimiititaliaata piffissarititap iluani oqallisigisinnaassaneraa ilisimaneqanngilaq, aappassaaneerneqarnissaalu kinguartinneqartariaqassagunarluni.
Allattoq Mads Lynge
Isumaliutissiissut novembarip sisamaani piareersinnaanissaa ilimagineqarpoq, aappassaaneerneqarnissaalu novembarip arfineq-aappaani pisussanngorlugu Inatsisartut siulittaasoqarfianut qinnutigineqarpoq.
- Isumaliutissiissummik saqqummiussinissarput sioqqullugu allannguutissat 200-ngajaat oqallisigisussaavagut, taamaammat oktobarip 31-aatinnagu angumerisinnaanngilarput. Allannguutissatut siunnersuutit kalaallisoortaat 50-it sinneqartut ippassaq aatsaat nassiunneqarput, Aningaasaqarnermut ataatsimiititaliami siulittaasoq Augusta Salling oqarpoq.