Inatsisissaq illuatungiliuttunit itigartinneqarniarpoq
Aningaasanut inatsissisamut siunnersuut aappaagumut atuuttussaq Inatsisartut ullumikkut ataatsimiinnerani taasissutigineqarpat, illuatungilittut partiivi Siumut aamma Atassut siunnersuummut itigartitsiniarput.
Allattoq Jaaku Lyberth
novembarip 27-at 2009 06:01
Aningaasaqarnermut ataatsimiititaliami ilaasortat, Per Berthelsen Siumut aamma Finn Karlsen Atassut, Sermitsiami apersorneqarlutik oqarput, aningaasanut inatsissisamut siunnersuummi ataasiakkaanik akuersillutik taaseqataaniarput, aningaasanullu inatsisissatut siunnersuut tamakkiisoq akuerisinnaanagu oqarput.
Aningaasaqarnermut Naalakkersuisup Palle Christiansenip aningaasanut inatsisissatut siunnersuut saqqummiuttussaavaa, illuatungiliuttullu isumaqarput, missingersuut Palle Christiansenimit kusassarneqarsimasoq.
Sanaartugassatut pilersaarutigineqartut arlaqartut kinguartinneqarput, aningaasanillu 36 millioner koruuninik sipaarniartoqarniarnera illutungiliuttunit isornartorsiorneqarpoq.
