Inatsisinik unioqqutitsinerusoraat

Aarhusip Universitetiata marsip qulingiluaanni DMU-mik - Danmarkimi avatangiisit pillugit misissuisarfimmik matusiniarluni aalajangernera, sulisullu 500-t aaqqissuuseqqinnerup kingorna ingerlatsivinnut nutaanut agguataarmagit, tamanna inatsisinik unioqqutitsineruvoq.

Danmarkimi pinngortitamik illersuiniaqatigiiffik, Danmarks Naturfredningsforening aamma Det økologiske Råd taama isumaqarput.

Taamaattumik taakku matusineq inatsisitigut unioqqutitsinerunnginnersoq folketingip Ombudsmandianut nalileqqullugu qinnutigaat.

Suliaq Kalaallit Nunaannut soqutiginaateqarpoq, tassami DMU Danmarkimi aammalumi Kalaallit Nunaanni avatangiisit pillugit misissuisarmat. 

DMU-p matuneqarnissaanik aalajangiisoqartinnagu, ilisimatusarneq pillugu siunnersuisoqatigiit tusarniarneqarsimasariaqaraluartut Pinngortitamik illersuiniaqatigiiffik kiisalu Økologisk Råd isumaqarput, kiisalu DMU-p suliarisartagai allanngortinnagit aaqqissuussinermi nutaami ingerlanneqarnissaanik siunertaq, Aarhus Universitetip uppernarsassallugu amigaatigigaa.

DMU-p ilisimatusarneq pillugu pisortaata Jesper Madsenip, DMU-p Kalaallit Nunaat pillugu ilisimatusarnera allanngortiterinerup sanngiillisinnavianngikkaa, radioaviisimut siornatigut oqaatigereerpaa.

Aaqqissuussineq nutaaq pilersaarutit naapertorlugit 2011-mi juulip aallaqqaataanni atuutilissaaq.