Inatsisilerituut amigaataaqaat
Tassa inatsisilerituutut atorfinnit 50-usunit 25-iinnaat maannakkorpiaq inuttaqarput.
Atorfiit taakku tamakkiisumik inuttalersorneqanngippata, tamanna Inatsisartut ataatsimiinnissaannut sunniuteqarsinnaasoq, inatsisillu nutaat kinguartinneqarsinnaasut, Namminersornerullutik Oqartussani inatsisinik atuutsitsinermut pisortaq Søren Volder taama oqarpoq:
- Siunissaq ungasinnerusoq isigalugu inatsisissatut siunnersuutit atuutilersinnaajunnaarnerannik kinguneqarsinnaavoq, sullissinerlu sivisunerulersinnaavoq. Søren Volder oqarpoq.
Taassuma erseqqissaatigaa tamanna aatsaat Inatsisartut upernaaru ataatsimiinnissaannut sunniuteqarsinnaasoq, ukiamummi ataatsimiinnissamut inatsitigut suliassat naammassineqalereermata.
Søren Volder, qaammatini arfineq pingasuinnarni atorfeqareerluni atorfimminit soraartussanngorpoq.
Inatsisilerituunik atorfinitsitsisarneq maannalu sulisoreriikkanik attassinissaq siunertaralugu Aningaasaqarnermut Sulisoqarnermullu aqutsisoqarfimmit Naalakkersuisunut innersuussuteqarnissaq maanna sulissutigineqarpoq.
