Inatsisilerituunik misissuisitsinissaq itigartippaat
Qasigiannguani efterskolissamut atatillugu immikkut aningaasaliissutit akuersissutigineqarnerannut tunngatillugu, naalakkersuisuni ilaasortat arlallit inatsisinik unioqqutitsisimasinnaanerannik inatsisilerituunik, arlaannaannulluunniit attuumassuteqanngitsunik misissuisitsinissaq, maanna Siumumit Atassummillu itigartinneqarpoq.
Inatsisartut Siulittaasoqarfianni naalakkersuisoqatigiit amerlanerussuteqarnermikkut, misissuisitsinissap akisussaaffimmik aamma inissiinerusinnaasup Inatsisartuni oqaluuserineqaqqinnissaa itigartippaat.
Misissuisitsinissamik siunnersuut siusinnerusukkut Inuit Ataqatigiinnit saqqummiunneqarpoq, tamannali inatsisartuni taasisut amerlaqatigiinnerisigut pinngitsoortinneqarluni, tassa naalakkersuisunut ilaasortamik Tommy Marømik tatiginninnginnermik taasisitsineq naalakkersuisoqatigiit pinngitsoortimmassuk. Tamatuma kingornagut Atassutip siulittaasuata inatsisilerituunik misissuisitsinissaq isumaqatigalugu oqaaseqaraluarpoq. Taamaattorli tassa naalakkersuisoqatigiit siunnersuutip inatsisartuni oqaluuserineqaqqinnissaa itigartitsissutigaat.
Taamatut siunnersuuteqartoqarpoq, Kulturimut, Ilinniartitaanermut, Ilisimatusarnermut, Ilageeqarnermullu Naalakkersuisoqarfik kukkunersiuisunit oqaaseqarfigineqareersorlu.
Tassani oqaatigineqarmat naalakkersuisoqarfiup suut tamaasa atorlugit efterskoliliornissamut tunngasoq piviusunngortinniarsimagaa, naalakkersuisullu oqallisissiaani tusarniaanermi akissut piaaraluni ilanngutingitsoorneqarsimasoq. Taama pisoqarneranut Tommy Marøp saniatigut naalakkersuisunut ilaasortat allat pingasut ilisimanninnerarneqarput.
