Inatsisileritooq Demokraatit pillugit nalilersuisipparput
-Takisoorujussualiunngikkaluarluni apeqquserneqarsinnaasoraara ilaasortat Nuummi immikkoortortaqarfimmiit ilaasortaajunnaarsinneqartut aamma partiimiit ilaasortaajunnaarsinneqarsimanersut, Jens Paulsen oqarpoq, nangippotlu:
-Uanga isumaga naapertorlugu partiimiit ilaasortaajunnaarsinneqanngillat. Siulersuisuunerit partiimiit ilaasortaajunnaarsitsisinnaapput, tassa taakkua ilaasortaannaappata, siulersuisunut ilaasortaanngitsut. Siulersuisuunerni ilaasortat, soorlu Jens B. Frederiksen aamma Karen Lynge, ataatsimeersuarnermi aatsaat ilaasortaajunnaarsinneqarsinnaapput, tamannalu pisimanngilaq. Isumaqatigiinngittoqaannarpat malittarisassat naapertorlugit isumaqatigiissitsiniarnikkut ingerlariartoqaqqissinnaavoq, tamannalu pisinnaavoq Kalaallit Nunaanni eqqartuussiveqarfik saaffigalugu. Taava illuatungeriit immikkut sinniisussaminnik qinigaqassapput, pingajuallu isumaqatigiissutigineqarsinnaanngippat Kalaallit Nunaanni eqqartuussisuunerup taanna toqqassavaa.
