Inatsisartut upernaamut ataatsimiinnissaat

Inatsisartut upernaamut ataatsimiinnissaat marsip qulingiluaani aallartissaaq, eqqartugassallu pingaaruteqartut assortuussutaareersullu assigiinngitsut eqqartorneqassallutik.

Inatsisartut ataatsimiinneranni eqqartugassanut ilaassaaq utoqqalinersianut tunngasoq. Utoqqalinersisartut aningaasatigut atugaat qanoq aaqqiivigineqassanersut, inatsisartunit eqqartorneqassaaq. Utoqqaat amerliartorput, landskarsillu aningaasartuutigisartagassai amerliartussallutik.

Utoqqalinersiat qaffaavigineqarpata, ukiumut 40 mio.koruuninik aningaasartuuteqarnerulerneq pissaaq. Tamanna anguneqassasoq, inatsisartuni ilaasortat amerlanerussuteqartut kissaatigaat, ilaatigut akileraartarnermi akiliutinik qaffaanikkut aningaasat aaneqassallutik. Taamatut aaqqiiniarneq, akisussaalluni naalakkersuisumit aammalu demokratinit akuersaaruminaatsinneqarpoq.

Upernaaru ataatsimiinnissami eqqartorneqartussat pissangartut aamma ilagaat, kommunit kattussuutsinneqarnissaannut tunngasoq. Kommunit pinngitsaalillugit kommunersuarnut sisamaannarnut inissinneqarnissaat naalakkersuisooqataasup, Atassutip akuersaaruminaatsissimagaluarpaa. Maannakkulli Atassutip isummaminik allanngortitsisimanera, Atassutip iluani isumaqatigiikkunnarneq pilersippaa.

Aamma eqqartorneqartunut ilaavoq kommunit aaqqissuuteqqinnissaannut aningaasartuutit qanoq amerlatiginissaat. Aaqqissuusseqqinnerup qanorpiaq naleqarnissaa suli iluamik ilisimaneqanngilaq.

Aamma aalisarnermut tunngatillugu, aalisagartassiisarnermi immikkut ittunik akuersissutinik tunniussisarnerni, inatsisimmik allannguinissaq eqqartorneqassaaq.

Apeqquummut tassunga tunngatillugu, ukiaq manna ataatsimiinnermi eqqissiviilliorneq aallartippoq, ilaatigut Naalakkersuisut siulittaasuat Hans Enoksen, inatsisinik unioqqutitsisimasutut demokraatiniit pisuutitsinerit aallartinneqarlutik.

Upernaaq manna inatsisartuni ataatsimiinneq allartippat, eqqartugassat arlalissuupput, aammalu isumaqatigiinngissutaasartussat isumaqatigiissutaasartussallu amerlajumaarlutik.

Upernaakkut ataatsimiinneq sapaatit akunnerini sisamani ingerlanneqassaaq, poorskilli nalaani unikkallartinneqassalluni.