Inatsisartut upernaakkut ataatsimiinnissaat qanillivoq

Upernaakkut ataatsimiinnissamut Naalakkersuisut suliniutissanut siunnersuutaat 38-upput. Upernaakkut ataatsimiinnissamut siunnersuutini utoqqalinersianik aamma akileraartarutinit nutarsaanissamik siunnersuuteqartoqanngilaq.

Nukissiorfiit aktieselskabinngortinneqarnissaannut iluaqutissaasut  ajoqutissallu pillugit nassuiaasoqassaaq.

- Nukissiorfiup namminersortunngorsarneqarneranut iluaqutigisinnaasaat ajoqutigisinnaasaallu saqqummiunneqassapput, Naalakkersuisut sulittaasuat Aleqa Hammond oqarpoq.

Nukissiorfik aktieselskabinngortinniarneqarnissaanut nalilersuinerit oqallinnerillu aqqusaaqqaassavaat.

- Naalakkersuisuninngaanniit massakkut inatsisartunut oqaluuserisassanngortipparput. Aamma inatsisartut pingaarnersiuillutik partiikkuutaartumik oqariartornerat utaqqissavarput. Qanoq tunuliaqutsertigineqarnerluta aamma soorunami takoqqaasavarput.  Ilimagaara oqallittoqangaatsiassasoq. Nukissiorfiit inuiaqatigiinni pingaaruteqartutut inissisimammat, Aleqa Hammond oqarpoq.

Upernaakkut ataatsimiinnissamut sulissutigineqartussanut ilaapput KNR-ip siulersuisuisa sunniuteqarluarnerulernissaa, siulersuisunullu ilaasortat piginnaasaasa qaffarsarnissaat.

Saniatigullu Atuisut Siunnersuisoqarfiannik siunnersuisartussanik pilersitsisoqassasoq, taamaalillutik kattuffiit soqutigisaqaqatigiillu isummatik siulersuisunut tusarliuttarniassammatigik.
Tassani inuiaqatigiit pinerullugit sulissutigineqassaaq.

- Pissutigalugu inuiaqatigiit aningaasarpassuanik KNR-imut inatsisikkut akileeqataasarput. Isumaqarpugut taakkua innuttaasut akileeqataasartuusut tusarnaartartuusut atuisuusullu taakkua siunnersuisooqatigiivinik pilersitsinissat pissusissamisoortoq. Innuttaasut pigisaannut aamma sunniuteqaqataasarnissaannut pissusissamisoortutut isigigatsigu, Aleqa Hammond oqarpoq.

Upernaakkut ataatsimiinnissamut suliniutit ilaanniipput qamuteralaat ukiumut 900 koruuninik akitsuuteqalernissaannut aamma maskiinat sanaartornermi atorneqartartut 2000 kg qaangerlugu oqimaassusillut ukiumut 20.000 koruuninik akitsuuteqalernissaannut siunnersuutit.

Inatsisartut 2014-imi upernaakkut ataatsimiinnissaat martsip 18-ani aallartissaaq.