Inatsisartut upernaakkut ataatsimiinnerat ilungersunartoq uummaarissorlu
Inatsisartut upernaakkut ataatsimiinnerat uummaarillunilu ilungersunartunik pisimasoqarfiuvoq. Ingammik ataatsimiinnerup naammassilernerani, partit naalakkersuisoqatigiittut pingasuusut ilaat ataaseq ilaajunnaarsitaammat. Kisianni Inatsisartut ataatsimiinneranni raajat kisimik eqqartorneqanngillat.
2007-imi Inatsisartut upernaakkut ataatsimiinnerat nalilerniarneqaleraangat maanna raajat eqqaaqqajaaneqarnerussapput. Tassami qaleruallit taakkua mamarluinnartut pisuullutik naalakkersuisoqatigiit atorunnaarmata. Imaluunniit eqqornerusumik oqaatigalugu isumaqatigiissutigineqarunnaartut tassaapput avataasiorluni aalisarnermi nakkutilliinissamut nalunaarut aamma pisassiisarnermut malittarisat nutaat.
Isumaqatigiinnginnerup kinguneraa IA naalakkersuisoqatigiinnit anisitaammat, maannalu Siumut aamma Atassut marluinnaallutik naalakkersuisoqatigiilernerat. IA-p siulittaasuata oqaatigaa oqaluttuarisaanermi aatsaat siullermeersumik naalakkersuisut nalunaarut pissutigalugu uppitinneqartut.
Taamaalluarsinnaavoq. Kisianni raajat kisimik sammineqanngillat aamma isumaqatigiinngittuaannanngillat. Upernaakkut ataatsimiinnermi aalajangiiffigisassatut siunnersuutit 70-it aamma inatsisissatut imaluunniit peqqussutissatut siunnersuutit 18-it suliarineqarput. Taakkua ilaat ataaseq tamanit isumaqatigineqarluni akuersissutigineqarpoq, tassa utoqqalinersiat qaffanneqarnissaat, utoqqalinersiuteqalertarnerup kingusinnerusukkut atyuutsilertarnissaanik imalik.
Akuersissutaasoq annertooq alla tassa Nunatsinni kommunenik aaqqissuusseqqinneq. Tassani aalajangiisoqarpoq kommunet 18-it sisamaannan-ngortinneqassasut, ikaarsaariarnissamilu kommunenit tamanit sinniisuutitaqarnissaq qalakkeerneqassasoq kommunet sisamaannanngortinneqarnissaasa pinissaata tungaanut.
Erninermut atatillugu sulinngiffeqartarnermi malittarisassat pitsanngoriaate-qarput kiisalu Nunatsinni meeqqat pillugit siunnersuisooqatigiiliornissamik siunnersuut itigartitsissutigineqarluni.
Aalisartut piniartullu saniatigut suliffeqarsinnaanerat akuerineqarpoq 50 procent-ilu tikillugu saniatigut isertitaqarsinnaanerat akuersissutigineqarluni – inuussutissarsiutigalugu piniarnermik allagartaq annaanngikkaluarlugu.
Namminersornerullutik Oqartussat aammalu Kommunet inissiaataani attartortittakkani peqqussummi inissianik tigusisinnaanermi atugassarititaasut assigiinngissuteqarnerujussuat eqqartorneqangaatsiarsimavoq, ineqarnermullu naalakkersuisunngorlaap, Kim Kielsen-ip sulissaq tassunga tunngasoq misissorluarumallugu tunuartiinnarallarsimavaa.
Suliarineqartut taaneqareersut saniatigut apeqquteqaatit 15-it oqallisigineqarput aamma inatsisartunut nassuiaatit nalunaarusiallu qulingiluat tunniunneqarput.
Taamaattumik Inatsisartunut ilaasortanik pappilissanik qatsussisoqarsimassajunnarsivoq.
