Inatsisartut ullumi isumaqatigiipput

Inatsisartut ullumi ataatsimiinnerat naammassiaarpoq, oqaluuserineqartut annertunerusumik assortuussutaanatik naammassineqarmata. Nunanik avannarlernik killernik, tassa Savalimmiunik Islandimillu nunatta suleqateqarnerata annertusarneqarnissaanik Inatsisartut siulittaasuata Jonathan Motzfeldtip siunersuutaa Inatsisartuni ilaasortanit tamanit akuersaarneqarpoq.

Savalimmiunik Islandimillu suleqateqarnerup annertusarneqarnissaanik, nunani avannarlerni killerni atuakkiortunik pikkorissartitsisalernissamik aamma aningaasaliissuteqartarnissamik siunnersuutit imaqartut Inatsisartunit tamanit akuersaarneqarput.

Nunani avannarlerni killerni pinngortitami pisuussutit nungusaataanngitsumik iluaqutiginiarneqarnissaannik, avatangiisinik illersuinermi, nukissiuutillu avatangiisinik innarliisuungitsut atorneqarnissaat pillugit nunatta Islandip Savalimmiullu naalakkersuisuisa sulissutiginninnissaannik, nunat avannarliit killiit aalajangersagaannut Inatsisartut taperseeqqullugit Inatsisartut siulittaasuata Jonathan Motzfeldtip siunnersuutaa aamma akuersaarneqarpoq.

Imarpiup avannaani pinngortitamik, uumasuinik kulturimillu nakkutilliinissamik nunallu avannarliit killiit suleqatigiinnerisa ineriartortinneqarnissaannut nunat avannarliit killiit siunnersuisoqatigiiffiat pisussaaffeqarpoq. Siunnersuisoqatigiiffimmi nunarput Island Savalimmiullu naalakkersuisui tamarmik immikkut arfinilinnik ilaasortaatitaqarput.