Inatsisartut ukiakkut ataatsimiinnerat aallarteqqippoq
Nuna avannaarliit siunnersuisoqatigiiffiata Stockholmimi ataatsimiinera pissutigalugu inatsisartut ataatsimiinnerat sapaatip akunneranik ataatsimik unitsinneqarpoq.
Inatsisartut ullumi ataatsimiinneranni oqaluuserissassat assigiinngitsut qulingiluaapput.
Inatsisissatut siunnersuutit marluk aappassaaneerlugit oqaluuserineqassapput, akuerineqarnissaallu naatsorsuutigineqarpoq. Sanaartornermi neqerooruteqartitsisarneq pillugu inatsisissatut siunnersuutip allannguutissaa saqqumiunneqassaaq. Pisortat illuutaannik sanaartornermi namminersortut sanaartortitsinerannut inatsisip aamma atorneqarsinnaalernissaa siunnersuummi pineqarpoq.
Inatsisartut ataatsimiinneranni inatsisissatut siunnersuutitut saqqummiunneqartussap aappaa tassaavoq erngup nukingata innaallagissiornermut atorneqartarnera.
Siunnersuutip atuutilerneratigut Kalaallit Nunaanni nukissiornermut isumalluutissat mingutsitsiviunngitsut niuernerpalaartumik atorluarneqarnissaannut killissarititaasut pilersinneqarnissaat siunnersuummi ilanngunneqarpoq.
Avataaniit aningaasaliisoqarsinnaanera ammaanneqassaaq aammalu inuussutissarsiutinik nungusaataanngitsunik tunngaveqartunik nutaanik pilersitsinissaq ammaanneqarnissaa siunnersuummi ilanngunneqarpoq.
Tamatuma peqatigisaanik siunnersuutip atuutilerneratigut Namminersorlutik Oqartussat erngup nukinganik isumalluutinik aamma erngup nukinganik innaallagissiorfinnik siunissamut ungasissumut atuisinnaanissaat naatsorsuutigineqarpoq.
