Inatsisartut timmissat pillugu nalunaarut oqallisigaat

Timmissat pillugit nalunaarut Inatsartuni ullumi siulliullugu oqalliserineqarpoq.

Piujuaannartitsinissaq isumatusaartumillu piniartoqartarnissaa partiinit tamanit isumaqatigiissutigineqarpoq.

Suleqatigiissitaliat suligasuartussat pilersinneqarnissaat siunniunneqarpoq.

Nalunaarutip ullutsinnut naleqqussarneqarnissaa pillugu susassaqartut pingaarnerit sulisinneqassapput, tassa tamatigoortumik inuttalimmik suleqatigiissitaliortoqarniarami.

Peqqissaarutaasumik naliliisoqarnissaa naalakkersuisut pingaartikkaat avatangiisinut naalakkersuisup Arkalo Abelsenip oqaatigaa:

- Taamaammat mianersortumik periuseqarnerup attattuarneqarnissaa pingaartipparput. Taamaalioreernikkut nalunaarut ullutsinnut naleqqusssarneqarsinnaalissaaq, Arkalo Abelsen oqarpoq.

Oqallinneq akunnerup ataatsip missaannik sivisussuseqarpoq.

Timmissat piniagaaqqilernissaat Anthon Frederiksenip piumasaqaatigaa, suliamillu kinguarsaaneq unitseqqullugu:

- Suliassaq Inatisartut Naalakkersuisullu akornanni utikajaartinneqarnissaa pisariaqanngilaq. Sullinniakkavut silamiipput, aaqqiisoqarnissaalu utaqqikatappaat, Anthon Frederiksen oqarpoq.

Timmissat piniagaanerisa pillugit naliliisoqaqqinnissaa Inuit Ataqatigiinnit iluarisimaarutigineqarpoq, oqaaseqartualli, Ane Hansenip, oqaasii naapertorlugit avannaamiut nererusunnerusaat suunersut qularutissaanngilaq:

- Qularutissaanngilaq avannaamiut appatorsinnaanertik mitertorsinnaanertillu kukkukuuarartornissamiik orniginerusaraat, Ane Hansen oqarpoq.