Inatsisartut suleriaasiat unioqqutinneqarsimavoq
Inatsisartut siulittaasuata Ruth Heilmannip misissueqqullugu iminnikuusaa tassaavoq inatsisileritooq danskeq Leif Senholt, Taassuma misissuinermini erseqqissarpaa inatsisartuni ilaasortat inatsisartoqatiminnik ataatsimiittarfimmiinngitsunik taasissussisarsimasut pingasut pinerluttaalisitsinermut inatsimmik unioqqutitsinngitsut, unioqqutinneqartorli tassaasoq Inatsisartut suleriaasiat.
Inatsisartunili ilaasortat inatsisartut suleriaasiannik unioqqutitsisut qanoq pineqassanersut Ruth Heilmannip oqaatigiumanngilluinnarpaa. Taasissussisut ilaat, Inuit Ataqatigiinneersoq Esmar Bergstrøm misissuinermik inerniliisoqarnissaata tungaanut sulinngiffeqarallarpoq. Atassummeersup Emilie Olsenip Inuit Ataqatigiit siulittaasuannik, Kuupik Kleistimik, taasissussisimanini aamma nassuerutigaa, isumaqarporli nammineq pisuussuteqarani uippallertitaalluni taasissussisoorsimagami. Nassuertut pingajuata Demokratineersup Palle Christiansenip siullersaalluni allamik taasissussisimalluni nassuerutigaa, kinguninngua taanna partimini politikkikkut oqaaseqartartutut tunuartitaavoq.