Inatsisartut suleriaasiat paatsuunganartoqanngilaq
Kalaallit Nunaanni Inatsisartut suleriaasiat naapertorlugu paragraf 44-mi, tassa Inatsisartut ataatsimiittarnerat pillugu malittarisassaanni allassimavoq, issuaaneq aallartippoq:
”Inatsisartuni ilaasortat ikinnerpaamik affaat najuuppata taaseqataappatalu Inatsisartut aalajangiisinnaassuseqarput. Ilaasortaq taaseqataasinnaassaguni inimi ataatsimiiffimmini nammineerluni najuutissaaq”, issuaaneq naavoq.
Tassa imaappoq, Inatsisartunut ilaasortat tamarmik immikkut apeqqummut ataatsimut ataatsimik taasisinnaassuseqarput.
Paragraf 44-p immikkoortuata aappaanni allassimavoq, issuaaneq aallartippoq:
”Ilaasortat nikuillutik qarasaasiatigulluunniit atortulersuutit atorlugit taasisassapput”, issuaaneq naavoq.
Inatsisartut siulittaasuata Ruth Heilmannip Inatsisartunut ilaasortat tallimanngormat sakkortuumik uparuarpai, ilaasortat ataasiakkaat partiimi ilaasortaqatitik, Inatsisartut ataatsimiittarfianni najuutinngitsut, taasisitsinermi taasisittarsimagaat tusatsiarneqarsimammat. Ruth Heilmann ilaatigut ima allappoq:
- Ilaasortaq alla sinnerlugu taasineq kikkulluunniit oqartussaaqataanerannut tunngaviusumik ilungersunartorujussuarmik unioqqutitsineruvoq, Inatsisartut siulittaasuat allappoq, nangipporlu:
- Paasineqarpat qarasaasiakkut taasisitseriaaseq Inatsisartut ilaasortaasa atornerlukkaat tamanna Inatsisartut Siulittaasoqarfiannut saqqummiunneqassaaq, naatsorsuutigineqassaarlu unioqqutitsineq sakkortuumik iliuuseqarfigineqassasoq, Ruth Heilmann allappoq.
