Inatsisartut: Piniartut saniatigooralugu angallassisartut tusarluarput

Inatsisartut ullumi ataatsimiinnerminni piniartut atugaannut tunngasut oqaluuseraat, oqallinnerallu piniartunut tusarluarnartumik inerneqarpoq. Tassa piniartut soorlu saniatigooralugu takornarianik angallassisarnermikkut piniarnermik inussutissarsiuteqarnermut allagartaarneqartarunnaarnissaat Inatsisartuni amerlanerussuteqartunit tapersersorneqarmat.

Piniartut piniartuunermik saniatigut takornarianik angallassillutik isertitaqarpallaarsimagunik piniarnermut allagartaarneqarsinnaasarput, pissutsillu taamaattut siunissami oqaluttuaannanngortinniarneqarput. Tassa Inatsisartuni ilaasortaq Inuit Ataqatigiinneersoq, Inatsisartullu Aalisarnermut Piniarnermut Nunalerinermullu ataatsimiititaliaani siulittaasoq, Ane Hansen, siunnersuuteqarpoq, piniartut takornarianik angallassinerminni isertitarisartakkatik pissutigalugit allagartaajarneqartarunnaassasut, siunnersuutaalu amerlanerussuteqartunit tapersersorneqarpoq, aappassaanneerneqartigani ataatsimiitaliamut suliarisassanngortinneqarluni.

Ane Hansen oqarpoq piniartut takornarianik angallassillutik isertitaqartarneranni ajornartorsiutaasartoq, soorlu Illoqqortoormiuni qimusseriarfigineqartartumi takussaasartoq.

Inatsisartuni ilaasortap allap, tassa Siumumeersup, Ruth Heilmannip, siunnersuutaa, piniartut saniatigooralugu isertitaqartarnerannut aamma tunngasoq, Ane Hansenillu siunnersuutaanut assingusumik imaqartoq aamma aappassaanneerneqartigani ataatsimiititaliamut suliarisassanngortinneqarpoq.

Attaviitsup Esmer Bergstrømip siunnersuutaa, piniartut aalisartullu ersarissumik immikkoortinneqarsinnaaqqullugit inatsisit naleqqussarneqarnissaannik, aammalu, piniartut aalajangersimasumik aningaasarsiaqartinneqartalernissaannik ilaatigut imaqartoq, aappassaaneerneqartigani piniarnermut aalisarnermullu ataatsimiititalimi suliarineqassaartaaq.