Inatsisartut Peqqissutsimut naalakkersuisumut tatiginnikkunnaarput
Inuit Ataqatigiit, Kattusseqatigiit Partiiata Demokraatillu ualigaa nalunaaqutaq tallimanngulersoq Arkalo Abelsenip tunuarnissaanik piumasaqarmata inatsisartut ataatsimiinnerat unitsinneqarpoq. Naliginnaasumik naalakkersuisumut tatiginikkunnaaarnermik tamanna taaneqartarpoq.
Illuatungiliuttut isumaat naapertorlugu inatsisit pingasoriarlutik unioqqutinneqartarsimapput.
Siullertut taaneqarpoq Inatsisartuni MIPI oqallisigineqarmat Naalakkersuisup pingaaruteqartunik isertuussilluni paasissutissiisimanera.
Taamatullu utoqqaat illuini utoqqaat nakorsaasersorneqartarnerannut atatillugu paasissutissanik pingaaruteqartunik isertuussisimasutut illuatungiliutut Naalakkersuisoq isornartorsiorpaat.
Illuatungiliuttut tatiginnikkunnaarnerminnut pissutaasa pingajuat tassa Dronning Ingridip Napparsimavissuani pissutsit ilungersunarsilluinnartut pillugit Peqqissuseq pillugu ataatsimiititaliap oktobarilli pingajuani allakkatigut saaffiginnissutaanut Naalakkersuisup qisuariarsimannginera.
Naalakkersuisup Arkalo Abelsenip Naalakkersuisutut akisussaaffimmi suunerinik paasinnilluarsimanngitsutut pissusilersortarnermigut Inatsisartut sulinerminnut atatillugu inatsisaannik 1993-imi maajip ulluisa 13-ianeersumik normu 6-imik unioqqutitsisimasutut illuatungiliuttunit Naalakkersuisup tunuarnissaa piumasarineqarpoq.
