Inatsisartut paasissutissanik suli politiinut tunniussaqanngillat

- Paasissutissat qinnutigisavut suli pissarsiarinngilavut, politimesterip tullia Morten Nielsen oqarpoq. Paasissutissat taakku pissarsiaritinnagit, unnerluussut isummerfigisinnaanngilarput, Morten Nielsen Atuagagdliutinut oqarpoq.

Innuttaasut ilaata naammagittaalliortup Jonathan Motzfeldt, Hans Enoksen, Jørgen Wæver Johansen aamma Tommy Marø siorna maajimi politiinut unnerluutigai. Tamanna pivoq, Atuagagdliutit "Nuimasut piisaarnerannik" taallugu allaaserinneqattaareersullu. Allaaserisani politikerit ilassinninnermut aningaasaliissutinik atuinerat sammineqarpoq.

Paasissutissat sooq politiinut suli tunniunneqarsimannginnersut ilisimaneqanngilaq. Inatsisartut siulittaasoqarfiat atorfilittaalu, ulluni makkunani paasisassarsiorlutik angalapput.

Inatsisartut Allattuunerata Ellen Kolby Chemnitzip tusagassiuutinut nalunaarummini erseqqissarpaa: "Suliassaq allaffissornerinnakkut ingerlanneqartoq, paasissutissanillu paarlaasseqatigiittarnermi naalakkersuinikkut akisussaasut akuliutsinneqarneq ajortut".